Informal settlers gitanyagan og pautang

CEBU, Philippines – Gitanyagan ang mga informal settlers nga beneficiary sa 6.5 ka ektaryang luna nga relocation site sa Paknaan, dakbayan sa Mandaue nga pautangon sa Socialized Housing Finance Corporation. (SHFC) sa kantidad nga P250,000.

Kini aron pagdasig niadtong mga nagdumili pagbalhin tungod sa problema sa kwarta nga ipatukod sa ilang balay.

Gipahibawo ang maong tanyag ni Tony Pete Juanico, pangulo sa Housing and Urban Development Office (HUDO) sa Mandaue, atol sa workshop sa mga informal settlers nga gitambongan sa mga lider sa 12 ka homeowners associations sa dakbayan.

Si Roger Paller, public information officer (PIO) sa siyudad, miingon nga  sa 1,200 ka mga beneficiaries, maoy hingpit pa nga nakabalhin ang 400 ka pamilya.

Matud niya nga ang kagamhanan migasto na og P8 milyones alang sa pagpalambo sa dalan paingon ngadto sa relocation site sa paghatag og kasayon sa pag-agi sa mga informal settlers nga mamalhin na og puyo sa relocation site nga giandam sa kagamhanan.

Dugang ni Paller nga gipaspasan usab ang kaugmaran sa nahisgutang relocation site pinaagi sa P13 milyones nga kantidad nga bulldozer nga gipalit sa siyudad.

Si Juanico miingon nga kasamtangan karong gitanyag sa SHFC ang  house-and-lot package sa kantidad nga  P250,000 ngadto sa tanang beneficiaries alang sa pagpalit og luna ug pagtukod sa duha ka andanang panimalay nga data-datahan sulod sa 25 ka tuig. Gitataw ni Juanico nga kadtong mga beneficiaries nga nakapatukod na sa ilang panimalay makapangutang gihapon aron gamiton sa pag-ayo sa ilang panimalay o sa pagpalambo pa sa kahimtang niini. -/GMR) (BANAT NEWS)