Manay Kris mipanaw sa edad nga 78

CEBU, Philippines - Mipanaw na sa edad nga 78 kagahapon ang  beteranong media personality  ug Banat News entertainment columnist nga si  Lucrecio "Manay Kris" Relatado .

 "Di ko kalimot sa iyang pain. Pero mas ganahan ko maka-remember sa iyang happy days. He was full of jokes," matud pa ni Rowena Ontina, pag-umangkon ni Relatado.

 Sa iyang autograph nga iyang gihimo alang kang Garry Lao, reporter sa The Freeman niadtong Pebrero 2005, matud pa ni Relatado ikasubo niya ang makakita og mga tawo nga masulob-on. Nailhan si Relatado nga usa ka komedyante sa radyo ug sa telebisyon. Usa sa mga sikat niya nga salida, ang "Si Got Da Wanderpol," diin nailhan siya sa iyang karakter nga "Kapitan Eguel."

 Si Relatado namatay alas 10 sa buntag kagahapon sa iyang panimalay. Matud pa ni Ontina, bisan pa man nasakit na ang iyang uyuan, nagmagahi kini nga magpaospital.

 "Di na siya pa-admit. Katong makasulti pa siya, moingon man pirmi kapoy na kuno siya, ganahan na siya mopahuway. So daan na nga ready na siya," matud pa niya.

Niadto lang Mayo nahibaw-an nga adunay  cancer sa dila si Relatado, apan matud pa ni Ontina, sa miaging tuig pa kini nagmo nga sakit ang iyang ngipon, gani napaibot  pa niya ang problemadong ngipon.

Dugang pa niya nga stage 4 na ang cancer ni Relatado sa diha'ng nahibaw-an nila ang kondisyon niini.

 Si Relatado nagsugod sa iyang career isip usa ka personalidad sa radyo sa dihang nag-edad pa kini og 20 anyos. Gawas sa "Si Got Da Wanderpol," lakip pud siya sa mga artista sa "Tres Metros" sa CCTN Channel 47. Regular pud nga molugwa ang iyang "Kristal" nga column sa Banat News.

Ang haya ni Relatado anaa sa usa ka kapilya tapad sa iyang panimalay sa N. Bacalso Ave., Barangay Sambag I. Wala pa masabuti sa iyang pamilya ang adlaw sa iyang lubong.