Mga tanod sa Duljo-Fatima wa motabang sa kapolisan

CEBU, Philippines - Wala nalipay ug dismayado ang hepe sa City Intelligence Branch (CIB) sa Cebu City Police Office sa mga barangay officials sa Barangay Duljo-Fatima human sa nahitabong raid sa kapulisan nga miresulta pagkasikop sa mga iladong tigpayuhot og  drugas sa ilang dapit.

Sumala pa ni Superintendent Romeo Santander dihang naabot sila sa lugar, nasuta nga duol ra kaayo ang balay sa ilang target sa barangay hall. Nalipay unta sila niini kay makagiya kanila ang mga barangay tanod apan sa dihang magsugod na ang operasyon, kalit nga nangawala ang mga tanod ug walay bisan usa nga mitabang kanila.

"Daghan na kaayo nga mga tawo sa area, lisod na kaayo, wala man g’yud sila mitabang, nawala man hinoon sila," matud pa ni Santander. Matud pa niya nga duna pa'y usa ka opisyal ang miingon nga mananghid una sila sa ilang labaw kung mahimo ba silang motabang sa mga polis.

Matud pa ni Santander nga usa sa mga gipanumpaan sa mga barangay officials naglakip sa pagtabang, ilabina kung kini kabahin sa kahapsay ug kalinaw sa ilang lugar. Ang target nga balay dunay nakuhang daghang mga drugas. Gitun-an na karon sa CCPO ang posibleng pagpasaka og reklamo sa mga tanod nianang mga orasa.  (BANAT NEWS)