Mga vulcanizing shop, boarding ug lodging houses sa Talisay wala’y permit

CEBU, Philippines - Ubang mga lodging ug boarding houses sa dakbayan sa Talisay wala’y mga permit, kini nasuta human sa gipahigayong inspection sa kabomberohan sa siyudad.

Ang maong pagsusi kalabutan kini sa umaabot nga pagbukas sa klase karong Lunes.

Ang hepe sa city licensing division nga si Jane Enrile mikompirma nga ubay-ubay nga lodging ug boarding house sa siyudad ang wala makalukat og permit.    

Si City Fire Marshal, Randy Mendaros mibutyag nga gawas sa mga permit gisusi usab nila ang mga electrical wiring sa edipisyo.

Gipasabot ni Mendaros nga buot nilang masiguro nga layo sa disgrasya ang mga trabahante ug mga estudyante nga mopuyo diha sa mga kwarto ug sa balay nga paabangan.

Gawas sa boarding ug lodging houses ang mga nag-operate og vulcanizing shop sa Talisay wala usab kini mga permit.

Si Enrile mibutyag nga ang siyudad dunay ubay-ubay nga nag-operate og vulcanizing shop apan duha lang sa maong mga vulcanizing shop ang milukat og permit.

Matud ni Enrile nga niadtong milabay’ng Martes giimbitar siya sa pagtambong sa gipahigayong meeting sa City Peace and Order Council (CPOC) diin gituki sa maong meeting ang mga nangguhong vulcanizing shop diha kabarangayan sa siyudad.

Ang mga tag-iya sa vulcanizing shop gikatakdang padalhan og notice ni Enrile sa pagtuman sa lagda sa balaod sa siyudad.

Base sa ordinansa sa siyudad nga nag-regulate sa operasyon sa mga vulcanizing shop nga kinahanglang dunay working area ang mga nag-operate niini aron mahatagan sila og permit.

Dugang ni Enrile nga si city legal counsel  Alfredo Sipalay na maoy mopadala unya og “notice for closure” sa mga vulcanizing shop nga walay permit.  (BANAT NEWS)