Sports Science seminar ng PSC kasado na

MANILA, Philippines - Madadagdagan  pa ang kaalaman ng mga coaches at trainers hinggil sa Sports Science sa gagawing apat na araw na seminar na sisimulan sa Lunes sa Philsports Arena sa Pasig City.

Sina Ali Gilbert ng Great Britain at American Terry Rowles ang siyang darating para magbigay ng pananalita sa aspetong ito.

“Magkakaroon uli ng pagkakataon ang lahat ng mga coaches at trainers na magkaroon ng dagdag na kaalaman sa sports science mula sa experts galing sa ibang bansa. Tulad sa naunang seminars, tiyak na maraming mapupulot ang mga dadalo at kanila itong maipapasa sa mga hawak na atleta,” wika ni PSC chairman Ricardo Garcia.

Libre ito sa lahat ng dadalo at malaki ang bilang ng partisipante ang inaasahan dahil ang seminar ay gagawin matapos lamang ang Philippine National Games.

Patuloy na bibigyan ng libreng akomo­dasyon ng PSC ang mga coaches/trai­ners na galing sa probinsya na dadalo sa seminar.

Noong nakaraang taon ay tatlong seminars sa sports science ang isinagawa ng PSC at ang mga naging tagapagsalita ay sina Milo Bryant, Jason Glass at Janet Alexander.