Duha ka pagpanglungkab sa samang lugar

CEBU, Philippines -  Duha ka mga kaso sa pagpanglungkab ang nadiskubrehan sa samang dalan ug barangay dinhi sa dakbayan sa Sugbo sa miaging buntag.

Unang nadiskubrehan ang pagkahanaw sa dul-an sa P90 mil nga balor sa mga gamit ug alahas sa usa ka  Letecia Delos Reyes, 45,  diha sa iyang balay nga naa mahimutang sa dalan F.Llamas sa Barangay Punta Princesa sa miaging buntag.

Ang managkapuyo nga sila si Wendel Tampipi, 35, ug si Daisy Jane Valle, 27, pulos lumad nga taga Molave, Zamboanga del Sur nga kasamtangang nagpuyo sa maong dapit maoy gitumbok nga nikawat sa maong mga butang.

Base sa imbestigasyon sa kapolisan, ang pag-umangkon sa biktima nga si Jessa Mae Lopez mitawag kaniya nga gilungkab sa duha ang iyang balay.

Sa laing pagpanglungkab sa mao gihapon nga dalan, usa ka branch sa Alberto’s Pizza ang gikawatan og kapin P200 mil nga balor sa mga gamit lakip na ang P80 mil nga halin sa maong tindahan.

Apan ang kapolisan nagduda nga inside job ang maong pagpanglungkab tungod kay walay nakita nga timailhan nga pugsanong giablihan ang maong establisamento.

Si SPO3 Jelson Solibio nga nahinabi sa Banat News miingon nga gikuhaan og fingerprint samples ang mga empleyado sa maong tindahan apan wa makuha-i og fingerprint ang security guard tungod kay wala kini mopakita sukad sa insidente.  (BANAT NEWS)