Trending ang breakup

CEBU, Philippines -  Trending worldwide sa mga social networking site ang break-up nilang Monica (Angel Locsin) ug Adrian (Jericho Rosales) sa seryeng The Legal Wife sa ABS-CBN. Sa miaging gabii,  nakahukom na si Monica nga magbuwag una sila ni Adrian gumikan sa padayon nga pakigrelasyon niini ngadto kang Nichole (Maja Salvador).

Hinay-hinay lang

Gihimakak ni John Prats ang report nga matud pa hilom siya nga ni-propose ngadto kang Isabel OIi. Sa interview niini sa ABS-CBN News, giklaro ni John nga maabot ra gyud ang saktong panahon alang sa maong butang.

American Idol mihinay

Gipamub-an sa Fox Twenty-First Century ang ilang programa nga American Idol. Sa report sa Reuters. Tapakan ang nabakante nga oras pinaagi sa pagsalida sa Batman-inspired show "Gotham".  Giingong mikunhod ang ratings sa American Idol.

Gitugtan sa anak

Gitugtan na si Sunshine Cruz sa iyang mga anak nga makig-date og lalaki. Matud pa nga maka-handle na si Sunshine sa iyang kaugalingon human sa taudtaud na nila nga breakup ni Cesar Montano .Apan giklaro ni Sunshine nga dili pa siya andam nga makabaton og bag-ong hinigugma.

Anne ug Luis mag-duet

Mag-duet ang suod nga managhigala nga sila si Anne Curtis ug Luis Manzano sa umaabot nga "Annekapal" concert sa aktres sa Smart Araneta Coliseum. Kantahon sa duha ang "Forevermore" sa bandang Side A.

Hayden giprangkahan ni Vicki

Giklaro ni Dra. Vicki Belo nga wala na siya'y plano nga makigbalik pa sa iyang ex-boyfriend nga si Hayden Kho gumikan kay dili na gyud mawala sa iyang huna-huna nga nangabit si Hayden sa panahon nga uyab pa sila. Busa gi-awhag niya si Hayden nga magminyo na lang ug maghulma og kaugalingo'ng pamilya.

Heartless

Gihulagway ni Claudine Barretto nga "heartless" ang iyang maguwang nga si Gretchen Barretto gumikan sa padayon nga pagpangatake niini ngadto kaniya. Gihangyo ni Claudine ang iyang igsuon nga motak-om na lang aron mahunong ang kagubot.

Buwelta ni Greta

Gihimakak  ni  Gretchen Barretto ang pasangil sa iyang igsuon nga si Claudine nga matud pa  iyaha kining giingnan og  "baboy, lechon, laos ug magpakamatay ka na". Matud pa ni Greta nga nagsalimuang  lang ang iyang igsuon  gumikan sa  drugas ug sa sakit sa pangisip niini.

Hugyaw nga birthday gift

Gipadayag ni Julie Anne San Jose nga usa ka dakong regalo alang sa iyang adlaw’ng natawhan ang pagkapili niya  isip overall Female Teen Star of the Year sa PEPsters' Choice Award. Magsaulog sa ika 20 ka tuig nga adlaw’ng natawhan ang singer karong Mayo 20.

Giatngan ang tandem

Giatngan na ang subling panagpares sa  Kapuso teen stars nga sila si Barbie Forteza ug Derrick Monasterio sa bag-ong serye sa GMA-7 nga "The Half Sisters". Malakip usab niini sila si Thea Tolentino ug Andrei Paras .

Heart mi-greet sa iyang inahan

Wala nakahuna-huna si Heart Evangelista nga mo-greet  sa iyang nakasumpaki nga inahan alang sa kasaulogan sa Mother's Day niadtong Domingo.  Apan gidasig siya sa iyang mga kaubanan sa  Startalk busa napugos siya og greet niini.

Wala magpaapekto

Tsika pa ni Derek Ramsay nga magpuli-puli sila og tambag ni Kris Aquino sa usa’g-usa. Bisan sa intriga nga nanggawas tali nilang duha, wala gihapon naapektohan ang ilang panaghigalaay.

Excited sa kasal

Todo pangandam na si Gab Valenciano sa kasal nila sa iyang uyab nga Filipino-Spanish  nga si Tricia Centenera. Kahinumduman nga  ni-propose ang dancer ngadto sa uyab niya nga modelo atol sa graduation party sa iyang igsuon nga si Kianna Valenciano.

Katungod sa tawo

Gibutyag ni Lani Misalucha nga dunay katungod ang mga tawo sa gusto nila nga buhaton sa ilang lawas busa wala niya ikauwaw ang pagparetoke niya sa iyang ilong.  Matud pa niya nga magsige siya og atubang sa kamera busa wala'y dautan sa iyang gibuhat.

Hakot awards

Nanghakot og pasidungog ang mga Kapamilya teen stars atol sa 2014 Candy Reader's Choice Awards nga gipahigayon sa Rockwell Tent, Makati sa miaging gabii.  Nasakmit nila ni Kathryn Bernardo, Julia Barretto, Enrique Gil, Janella Salvador ug Jerome Ponce ang mga major awards niadtong gabhiona.