Kapitan gipasanginlang namusil og midwife

CEBU, Philippines - Si Pamutan Barangay Kapitan Ronaldo Labitad gipasanginlan sa iyang bayaw nga nanion og armas, dayon siya gipabuthan kaniadtong Huwebes sa hapon.

Si Emma Cabingatan, 40, midwife sa barangay Buhisan miingon nga pwerte’ng kuyawa niya sa gihimo kaniya sa kapitan.

Si Sr. Inspector Allan Rosario, hepe sa Guadalupe Police Station miingon nga mi-report si Cabingatan kanila apan wala na ang kapitan dihang gisusi nila ang dapit-nahitaboan.

Apan si Labitad nga nagkatawa mihimakak sa pasangil kay matud pa igo ra siya nga mibadlong ni Cabingatan nga di magsige og yawyaw ug di magpakauwaw.

Giangkon hinoon ni Labitad nga nagkabingkil sila si Cabingatan sukad pa niadtong eleksyon tungod kay misuporta kini og kandidato nga konsehal nga tua sa han-ay sa iyang mga kontra.  “Mikatawa lang gani ko, kung mokiha siya atubangon nako. Kun gipusil pa maigo unta, kataw-anan ana sir uy,” matud sa kapitan. (Bryner L. Diaz ug Rene U. Borromeo)

Tinuod g’yud nga mga adik

Nasuta g’yud nga tinuod nga mga tiggamitan og shabu kadtong siyam ka kawani sa Kapitolyo nga una na nga napositibo sa drug test.

Si Joey Herrera, ang executive director sa Cebu Provincial Anti-drug Abuse Commission, mitug-an nga ang confirmatory test nga gihimo sa Philippine Drug Enforcement Agency (PDEA) konpirmado ang resulta nga sila mogamit g’yud og drugas.

Gipahigayon niadtong Lunes sa PDEA ang random drug test ngadto sa 169 ka kawani sa Kapitolyo nga gipili pinaagi sa ‘computer-generated random selection process’.

Ang siyam ka empleyado, nga kasagaran mga sakop sa agency, nagpositibo sa screening. Human niini gipaubos ang resulta sa usa ka confirmatory test sa PDEA apan susama gihapon ang findings.

Matud ni Herrera nga aduna’y babaye sa siyam ka kawani nga nagpositibo sa shabu. Hinuon wala pa gibutyag kun asa nga mga buhatan nagtrabaho ang maong mga empleyado.

Sigurado nga adunay himoon ang mga opisyal sa Kapitolyo ngadto sa mga nagpositibo sa ilegal nga drugas.

Si Board Member Carmen Durano-Meca, co-chairperson sa CPADAC, miingon nga ilang itugyan ngadto sa Committee on Discipline and Investigation sa probinsya ang mga nagpositibo alang sa imbistigasyon.

Ang Comprehensive Dangerous Drugs Act naglatid nga pagpahawa sa serbisyo ang ipahamtang batok sa mga opisyal ug empleyado sa gobiyerno nga mapamatud-an nga naggamit og illegal nga drugas. (/RUB)(BANAT NEWS)