Clippers pasok sa playoffs

76ers nakaiwas maitala ang NBA record na 27 sunod na kabiguan

HOUSTON -- Tila mi­nalas ang Los Angeles Clip­pers sa kaagahan ng ka­nilang laro laban sa Houston Rockets.

Nagkaroon si All-Star Blake Griffin ng back spasms sa first quarter at nang magwala si Glen Davis  sa second period ay tinam­ba­kan na ng Rockets ang Clippers ng 13 points.

Subalit imbes na manlu­mo ay naging determinado ang Clippers sa pangu­nguna ni guard Chris Paul pa­ra talunin ang Rockets, 118-107.

Kumolekta si Paul ng 30 points at 12 assists at nag­dagdag si Jamal Crawford ng 22 points para igiya sa Clippers ang franchise-record nitong ikatlong sunod na playoff appearance.

Humakot naman si center DeAndre Jordan ng 20 points, 12 rebounds at 6 blocks para sa Clippers.

Ikinatuwa ni head coach Doc Rivers ang pagbangon ng Los Angeles mula sa isang 13-point deficit sa se­cond period.

‘’We’re here to win games and our guys are gro­wing up, they’re mature and it was great,’’ sabi ni Ri­vers.

Tinapos ng Clippers ang five-game winning streak ng Rockets, hindi nakuha ang serbisyo ni center Dwight Ho­ward bunga ng injuriy.

Ibinaon ng Rockets ang Clippers sa 15 points sa first half bago nakabawi ang huli para agawin ang unahan sa third period.

Ang magkasunod na three-point shots nina Matt Barnes at Darren Collison ang nagbigay sa Clippers ng malaking 114-101 bentahe laban sa Rockets sa fourth quarter.

Tumapos si James Har­den na may 32 points para sa Houston kasunod ang 28 ni Chandler Parsons.

Sa Philadelphia, naiwa­san ng 76ers na makapagtala ng record na 27 sunod na kamalasan matapos ku­nin ang 123-98 home victory laban sa Detroit Pistons.

Naglista si Thaddeus Young ng 21 points, 6 rebounds at 3 assists para sa 76ers, bago ang panalo ay may 18 dikit na kabiguan sa Philadelphia at 26 sa ka­buuan.

Ang Cleveland Cavaliers ang nagposte ng NBA record na 26 sunod na kabiguan noong 2010-11.

Sa San Antonio, umiskor si Marco Belinelli ng 18 points at sinakyan ng Spurs ang isang 17-game winning streak nang kunin ang 96-80 panalo laban sa New Orleans Pelicans