Pagpitol sa badlongong drayber
Gusto ni Cebu PNP provincial direktor Noel Gillamac nga magdistino siya’g mga polis nga pasakyon sa mga bus aron pagdakop sa mga drayber nga magpaturagas lang sa pagpadagan.
Buyno, nindot kini nga paagi aron malikayan ang aksidente sa kadalanan nga mugna sa kadanghag sa mga drayber. Apan kay pasul-ubon man og uniporme ang mga polis, mahimo nga magmatngon lang ang mga kiat nga drayber kun may polis nga sakay. Kun dili gud mag-uniporme ang mga polis, mosagol lang sila sa mga pasahero nga dili mailhan. Ang nakaproblema lang kay walay budget ang kapolisan aron ibayad sa plete sa mga polis.
Natural nga ang mga polis, magpinulis g’yud ug dili mobayad. Inigsakay nila, mohung-hong sila sa konduktor ug magpaila nga polis. Ang konduktor mosinyas ‘sab sa drayber.
Apan mas arang-arang na lang hinoon kini kay malikayan man ang dagko nga aksidente sa karsada kun dili magkiat pagpadagan ang mga drayber.
Apan kinahanglan nga kadtong mga polis nga pasakyon tudloan kun unsay mga balaud nga ilang ipatuman. Balaod kini nga gilatid sa Republic Act 4136, kon Transportation and Traffic Code.
* * *
Kun mobiyahe ka sa probinsya, makita gayud nimo unsa ka-abusado ang daghang drayber og mga bus ug ubang dagkong sakyanan. Sugaton nila ang mga gagmay nga sakyanan, sama sa awto ug uban pa.
Natural nga ang gamay mapugos sa pagpadaplin kay kun dili mopadaplin ang drayber sa awto, mapusa siya sa higante nga sakyanan. Nakasuway lagi ko sa una, naglumbaanay ang duha ka bus diha pa gayud sa taytayan sa Catmon. Lapad man ang taytayan mao nga nakamaneho sa pag-overtake ang usa ka bus nga pwerte’ng ituma og asu. Talisulod na ko niadto sa taytayan, apan pagkakita nako sa naglumbaanay nga bus, midali-dali ko’g padaplin ug mihunong.
Kun mideritso pa ko og padagan, sigurado nga napusa mi’ng tanan nga sakay sa awto. Wala ko’y nahimo gawas sa pagbagulbol. Wala pa ko ma-deputized sa LTO kaniadto mao nga igo lang ko nga naglingo-lingo.
* * *
Kanunay ko nga nakadawat og text message gikan ni Merlinda “Inday Amora†Batiller nga nagreklamo kabahin sa iyang tulo ka kaubang vendors og mga imahen nga matud pa niya “gahi’g mga ulo.â€
Mga tindahan kini diha sa tumoy nga bahin duol na sa eskena D. Jakosalem ug Osmeña Boulevard nga wala gayud mopanipis sa ilang mga pwesto.
Aw kun dili sila motahud sa kamandoan sa City Hall, awhagon nato si City Administrator Lucelle Mercado nga molihok na aron tudloan og leksyon kining mao nga mga vendors.
- Latest
