EDITORYAL - Taphaw nga Pagtabang

Daghang mga tawo gusto nga motabang pagsumpo sa misiaw nga problema kabahin sa illegal nga drugas.

Apan nagpasuwabi niining mao nga mga tawo ang pagkatalawan ug pipila ra kanila ang matinud-anon sa pagtabang nga masumpo ang problema.

Ang media kanunay nga makadawat og reklamo sa pagsiaw sa pagpamaligya og shabu sa hapit tanang lugar ug nga wala kini himoi og pagtagad sa mga tinugyanan sa balaod.

Apan kun pangutan-on ang mga informer kinsa ang mga drug pushers sa ilang dapit, dili motug-an. Dili kuno sila mohatag sa ngalan kay mahadlok nga basin og mahibaw-an nga sila ang nagtug-an.

Dinhi lang sa Sugbo kapin na sa duha ka milyon ang mga tawo nga nagpuyo ug kapin lang sa 2,000 ang nadistino nga polis. Sa tibuok nasud milyon-milyon ka tawo ang nagpuyo, apan kapin lang sa 100 mil ang tanang kapolisan.

May rason ang kapolisan nga dili nila maato ang paghipos og kasayuran batok sa mga badlongon sa katilingban tungod kay kuwang kaayo ang ilang gidaghanon.

Ang katawhan kabahin sa gitawag og “Five Pillars of Criminal Justice System” isip sakop sa Community. Ang laing upat ka haligi sa Criminal Justice System mao ang Law Enforcement, Prosecution, Courts ug Correction kon bilanggoan.

Kun adunay usa niining mao nga mga haligi nga huyang, hayan malukapa ang usa ka balay. Tungod niana, dili malampuson ang kampanya batok sa mga badlongon kun mahadlok kitang katawhan nga motuman sa atong katungdanan.