Bana lang sa katre

Kay di man gyud ta magkasabot Ma, maayo pa molayas na lang ka!” ni Brando ngadto’s iyang ugangan nga si Marita. Gipanulod na niya ang mga sinina sa iyang ugangan og dakong bag ug gitunol sa naulahi. Nia sila sulod sa sala sa balay nahimutang sa baryo Bagalay ning dakbayan. Nasuko lang si Brando nga wa labhi sa ugangan ang mga brief ug pantalon niya tungod sa pagsupak ni Marly, kapikas ni Brando.

“Ka wa gud nimo’y uwaw nga manghingilin nako! Unsa! Imo ning balay akong gipuy-an?!” ni Marita. Nasinta ug nataas ang tingog nga naglingkod sa sopa sa sala.

“Tag-iya man sab ko ani. Bana god ko’s imong anak! Conjugal property namo ni. Kay napalit ning balaya sulod sa among kaminyoon!” mapasigarbuhong pulong ni Brando.

Ang ugangan ug umagad lang ang nag-abot karong sayong kahaponon, adlaw’ng Sabado. Nag-relaksrelaks unta si Marita sa pagtan-aw og TV kay siya rang usa. Nanglakaw si Marly ug iyang anak nga si Nancy, 8 anyos, gipamalitan og gamit sa eskuylahan nga nalista sa iyang assignment. Unya takulahaw lang niabot si Brando ug malagutong nanghiling sa iyang lawak sa mga labhanan ug mga linabhan.

Wa na may maayong relasyon ang bana’g asawa. Iyahay na lang sila’g lakaw. Si Brando nga teller sa banko, molakaw o mouli sa adlaw iyang gusto. Mao sab si Marly nga receptionist sa usa ka five star hotel. Nakaamgo na man god si Marly nga iyang bana wala’y tampo sa ilang gastohan sa panimalay. Ang iya rang tampo, dulog sa katre. Way lain.

Sa balay ug yuta nila, si Marly ang nagbayad sa down payment ug maoy nagdata sa binulan nga bayranan. Sa ilang konsumo sa inadlaw’ng pagkaon, si Marly gihapon ang naggasto. Sa binulang bayranan sa tubig, telepono ug kuryente, kang Marly gihapon. Ang bayranan sa eskuylahan ni Nancy, gikan gihapong Marly.

“Pagkatinuod, malipay ko nga mahilayo ining inyong panimalay! Aron makapahuway ko. Kay ako gud inyong kusinera, labandera, yaya ni Nancy o over all and all round maid. Unya way suweldo. Busa, kun molayas ko, makakaplag kaha ka’g maid ug yaya ni Nancy? Maluoy lang ko’s akong apo. Maong niagwanta ko ninyo’g trabaho isip maid nga way suweldo-suweldo,” ni Marita. Wa katingog si Brando. Nanglipaghong.

“Maghuwat lang ko ni Marly. Kun si Marly ang mohingilin nako, kay siya may giila nakong tag-iya sa balay, mopahawa ko!” ni Marita. Ug unya...

“Unsa Ma? Gihinginlan ka ining kagwang dako! Ka wa gud niya’y uwaw. Oy! Oy! Oy! Ikaw ang angay mopahawa! Karon dayon! Kay wa kay pulos pagkabana. Bana ka lang sa katre! Wa kay bisan peso nga naamot sa atong pamuyo” ni Marly. Nagtulisok sa bana.

Nikalit siya’g sulod sa sala. Dugay na diay siyang naabot. Ug naghinayhinay og duol sa balay nga wa himangdi sa duhang naglalis. Nagpahipi sa pultahan. Kay nakadungog sa kasaba nila sa layo pa.

Minghoy ug nanglipaghong si Brando nga nisulod sa iyang lawak aron manghipos. (Katapusan)