Privacy

Dunay usa ka restawran sa dakbayan nga kasagarang anhaan sa mga tawong sikat. Dili lang sa mga artistang sikat, hasta sab ang mga abogadong sikat, negosyanteng sikat ug mga politikong sikat. Duna say mga kontrobersiyal nga mga tawo nga masuroy dinhi. Anhi sila maghisgot sa ilang mga sekreto.

Si Toto captain waiter sa maong restawran. Siya ang gikonsabo sa usa ka private investigator nga mobutang og bug o listening device (instrumento nga sekretong maminaw) sa usa ka paboritong lamesa sa kontrobersiyal nga mga tawo. Nagpirmihan dinhi (usahay paniudto, usahay panihapon) ang asawa sa usa ka dakong negosyante. Dili bana ang kuyog, kun dili, usa ka sikat nga abogado. Mga subra singkwenta na ang pangidaron sa abogado ug sa iyang kliyente. Ingnon ta lang kliyente ang babaye, kay maglabi man ang pangunsulta sa abogado kun nia sila’s restawran. Hangtud, may na-record si Toto nga matawag nga private kaayo nga panagsulti.

“Nagkahisgutay na man gyud ta sa atong mga personal nga kinabuhi,  pwede’g magpadayon ta sa paghisgot?” sa abogado. “Wa’y problema, attorney. Gipasagdan na man lang ko sa akong bana. Di man siya mokuyog nako bisan asa ko lakaw. Di siya maghikutar. Ako sab, wa na lay hikutar niya,” sa kliyente. “Magtupad pa mo’g katulog sa inyo?” “Wa na gyud. Lima ka tuig na.” “Mo-enjoy ka pa ba’g sex sa imong bana?” “Enjoy unta. Apan siya, tataw nga di na enjoy. Kay di na man mohagad. Siya, enjoy tingale sa lain.” “Ikaw, wa pa ka katilaw og lain?” “Di na nako mahimo, attorney.” “Ako sab, wa na gyud ko katilaw og lain, sukad ko naminyo. Apan, lima na sab mi ka tuig nga way sex sa akong asawa. Kay masakiton man siya’g kasingkasing. Di na man puwedeng mahago” (subo ang tuno). “Kaluoy sab diay nimo attorney, no.” “Kun maluoy ka nako, sulbaron nimo akong problema.” “Wa tay higayon, attorney. Kay daghang tigpaniid akong bana.” “Di ba mag-work out man ka kada Sabado’g Domingo sa buntag?” “O, tulo ka oras. Gikan sa alas sayis ngadto sa alas nuwebe.” “Tig-work out man sab ko. Di magduda atong tagsa ka kapikas, sa panahon sa atong work out.”

Gipadungog ni Toto ngadto sa iyang manedyer nga maoy mismo tag-iya sa restawran. “Tangtanga ang bug nga imong gibutang. Ug sunoga tanang kopya sa maong audio. Kay kun dili, ikaw akong tangtangon sa trabaho. Kinahanglan respetuhan nimo ang privacy sa tawo. Puro na sila gitawag og consenting adults. Kun magubot man ilang pamilya, kinahanglan wala tay partisipasyon sa maong kagubot!” mando ni Mr. Celso Tanco. “Unsa may akong isulti sa private investigator?” ni Toto. “Ingna siya, wa na nianha ang iyang subjects. Ug iuli niya ang bug ug ang pasiunang suhol nimo. Ako’y suhol nimo. Premyohan tika nga nakonsensiya nga nakahunahuna pa gyud og papaminaw nako,” dugang sa manedyer.

“Pasayloa ko, sir. Nga nahina’g sa salapi nga gitanyag sa investigator,” ni Toto. Nagminghoy. “Ok lang. Pero ayaw na gyud na’g usba. Sa sunod nimong pakigkunsabo og investigator, taktak na gyud ka’s trabaho. Di ko managana. Bisa’g maayo pa kang moserbisyo!” sa manager. (Kataposan)