Nangangkong sundalo gikasohan na sa CIDG-7

CEBU, Philippines - Nagtingkagol na karon sa prisohan ang usa ka 43-anyos nga lalaking nangangkong sakop sa militar kinsa nadakpan sa kapulisan sa illegal nga paghupot og armas sa Barangay Cogon, Danao City niadtong miaging semana.

Si Chief Inspector Rene Kyamko sa Criminal Investigation and Detection Group (CIDG)-7 mibutyag sa Banat News nga si Somala Marohombsar wa mo- file og counter-affidavit sa mga pasangil batok kaniya mao nga ilaha kining gi-turn over sa Bureau of Jail Management and Penology (BJMP) sa  Danao City.

Si Marohombsar nga taga Quezon City apan lumad nga taga Lanao del Norte, nadakpan nila ni Kyamko sa barangay Cogon sa Danao City niadtong Enero 24, 2014.

Ang akusado nag-atubang og kasong kalapasan sa Republic Act 10591 o Comprehensive Firearms and Ammunition Regulation Act ug walay pyansa nga gitugot alang sa iyang temporaryong kagawasan.

Ang CIDG-7 nakakuha og M16 rifle ug magazine niini nga may upat ka buhing bala ug tulo ka caliber .9mm Black Widow revolvers ug lain nga .9mm Beretta pistol nga way mga dokumento. Si Marohombsar nangangkon nga sakop sa Armed Forces of the Philippines (AFP) ug nadestino sa Luzon, apan sa pagsusi sa militar sa iyang record dili kini tinuod.  (BANAT NEWS)