Isla Paraiso

Gula 28

Dihadiha mikalit pagkuyanap sa tibuok lawak ang kangitngit. Brownout!

Ang kangitngit sa palibot sa lawak maoy nakapabalik sa kahimungawong ni sister Veronica. Mao pa siya makaamgo nga taudtaod diay siyang nawala sa kaugalingon. Misantop karon sa iyang hunahuna ang pagkuha sa gamay’ng flashlight nga iyang gitagoan sa usa ka drawer sa sulod sa iyang lawak. Iya kining gituyo sa pagbutang sa drawer panagana sa dili damhong pagkapalong sa sugang dagitabnon  sama sa nahitabo karon.

Dihadiha nagpanghiram ang iyang mga kamot taliwala sa kangitngit. Wala madugay, natultolan niya ang drawer.  Iya kining gibira ug gikuha ang gamay nga flashlight. Gipasiga. Dihadiha milukop ang kahayag niini sa sulod sa iyang lawak.

Wala tuyoa nga nakapanghupaw si sister Veronica sa dihang milingkod siya  pagbalik sa ngilit sa iyang kama. Ang iyang hunahuna gisunggal gihapon sa kahasol. Dili malaksi sa iyang hunahuna si Rey. Oo, si Rey. Nabalaka siya nga ang maong lalaki mahimo unyang kalbaryo sa iyang bokasyon.

Mitindog si Veronica. Mihinay siya paggawas sa iyang lawak nga nagbitbit sa gamay’ng flashlight. Mipaingon siya sa kosina. Gibati siya’g kauhaw mao nga moinom siya’g tubig. Naghinay siya sa paglakang aron dili makamugna’g kasikas nga makatugaw sa mahinanokon nga pagkatulog sa iyang mga kaubang madre sulod sa kombento.

Paghitungod niya sa nahimutangan sa refrigerator, mihunong si sister Veronica. -- Sumpayan pa