Martial Law sa Tacloban

CEBU, Philippines - Tungod sa desperasyon sa mga tawong apektado sa supertyphoon Yolanda sa siyudad sa Tacloban misaka ang krimen sa dakbayan sa Tacloban nga wala na mahikutar sa kapolisan tungod usab sa kalisod nga nahiaguman sa mga tawo.

Base sa mga balita sa telebisyon, gipangablihan sa mga tawo ang mga tindahan ug usa ka mall pa ang gi-ransack aron panguhaon ang mga paninda niini ilabi na ang mga pagkaon ug tubig.

Apan gawas sa batakang panginahanglan, hasta ang mga appliances ug mga butang nga dili nag-unang panginahanglanon sa mga tawo ang gipanguha.

Sumala pa sa report sa Rappler.Com, kini maoy hinungdan nga ang lokal nga kagamhanan sa siyudad nanawagan kang Presidente Benigno Aquino III nga mag-deklarar og Martial Law sa maong siyudad. Matud pa sa ilang bise mayor nga si Jerry Yaokasin, tungod sa kawad-on ug kanihit na sa supply sa pagkaon nahitabo ang susamang mga krimen, samang panahom usab ang gisuportahan ni Tecson Lim, ang city administrator sa siyudad.

Ang maong mensahe ilang gipaabot ngadto kang Aquino atol sa pagduaw sa presidente uban sa National Disaster Risk Reduction and Management Council.

Apan si Aquino miingon nga kinahanglang mopasar una og usa ka resolusyon ang konseho sa siyudad ug i-establisar kung duna gyuy hulga sa kasamok bunga sa sitwasyon ug i-endorsar sa mayor ingon man sa representante sa distrito, una pa siya motugot niini. Sumala pa sa mga report bisan ang mga ATM machines gipangguba na sa mga tawo ug gipanguha ang kwarta.

Si Aquino milahos sa Capiz City ug didto midiretso sa Colasi ug nanghatag og relief goods. Gikatahong dunay dose ka mga tawo ang nakalas sa maong dapit ug dunay mga missing.

Ang British Embassy mipahibalo kagahapon nga mopadala ang ilang nasud og dugang  £6 million o P414 milyones nga hinabang dugang sa nahauna na nilang gisaad nga balor  £4 million o P276 milyones nga ilang gihatag sa Zamboanga siege  ug linog sa Bohol.

"Sa ngayong oras ng matinding pangangailangan, makakaasa ang Pilipinas sa UK. Gusto naming iparating ang aming pakikidalamhati sa mga nawalan ng mga kaibigan at mahal sa buhay. Tuloy ang aming pakikipag-ugnayan sa inyong pamahalaan upang tumulong sa paglikas at pagligtas sa mga biktima ng bagyo. Tayo'y manalig at umasang malalagpasan din natin ang pagsubok na ito," sumala pa ni British Ambassador Asif Ahmad, kinsa maayong moestorya og Filipino. Samtang ang Amerika pinaagi ni Charge d'Affaires (Acting Ambassador) Brian Goldbeck, mipasalig nga mohatag og $100,000 P4.3 milyones  alang sa "provide health, water, and sanitation efforts" sa mga biktima. Ang U.S. mopadala usab sa mga sakop sa USAID Disaster Assistance and Response Team.  Mopadala usab sila og surface maritime search and rescue (SAR), medium-heavy helicopter lift support, fixed-wing lift support,  ug uban pa. Ang United Nations' World Food Programme mipagawas na og $2 million o P86 milyones ug mipasalig nga moapelar pa og dugang pundo aron mapakaon ang mga biktima.

Gipahibalo usab ni Aquino  nga prayoridad karon ang pagpabalik sa komunikasyon sa mga apektadong lugar. Mipasalig usab siya nga dunay katakos ang gobiyerno nga mahatag ang panginahanglan sa mga biktima.

Samtang gipasalamatan usab ni Aquino ang mga nasud nga misaad nga motabang lakip na ang Israel ug ang New Zealand. (Edwin Ian Melecio, Bryner Diaz ug Romeo Limpangog uban sa report sa Wires) (BANAT NEWS)