Lapukon nga panagang

Talagsaong kaisog, o kabaga sa nawong, ang gikinahanglan sa pagbarug ni Senador Jinggoy Estrada aron pagpanulisok sa iyang kaubanan ug ubang mga opisyal sa gobyerno. Atubangan sa seryusong mga pasangil ug baga nga lut-od sa mga ebidensiya batok niya, di sayon alang ni Estrada ang pagbarug ug paglabay og lapok sa tanang napakyas sa paghupo.

Apan nakalimot si Estrada pagpanalipod sa iyang kaugalingon. Wa siya magtagad pagpanghimakak og bisan usa sa daghan uyamot nga mga pasangil sa pagbolsa sa iyang pork barrel. Igo rang nibalikbalik sa reklamo nga sila rang taga oposisyon ang giinitan samtang giduphan ang mga alyado sa administrasyon nga gipasanginlan sab og kahiwian.

***

Labing maayo untang gihimo ni Estrada atol sa iyang usa ka oras nga pakigpung sa Senado mao ang pagkumbinser sa mga magbubuhis nga gitarung paggasto ang iyang pork barrel. Mahimo untang mas mapuslanon ang iyang privilege speech kon nisuway pa paggusbat sa lig-on nga mga ebidensiya nga dakong bahin sa iyang pork barrel nitugpa sa peke nga non-government organizations ni Janet Lim-Napoles.

Mobilib unta ang mga nakapaminaw sa iyang pakigpung kon gi-detalye pa diin padung ang dako uyamot niya nga pork barrel. Makapatuyang unta og papogi si Estrada kon nag-powerpoint presentation pa pila ka milyon ka pesos ang naggasto pagtukod og mga eskuylahan, mga tambalanan, kadalanan, mga taytayan ug ubang mahinungdanong mga proyekto.

***

Nagduda ko nga di pa andam si Estrada nga mo-detalye pagtubag sa mga pasangil batok niya. Mao nga gawas sa pagpasalig nga di siya kawatan ug pagpadayag og kasubo nga nabuling ang iyang ngan di pa siya makalalis nganong na-imbudo sa pipila lang ka NGOs nga way klarong mga proyekto ug beneficiaries ang minilyon ka pesos nga di iya kon dili ila sa naghago ug nagtukaw ug nagkugi ug nanlimbasog nga mga magbubuhis.

Masabtan ang kabakikaw ni Estrada. Usa siya sa wa magdahom nga mabisto kining nangalisbo nga higanteng eskandalo ug nga mahimutang siya sa tungatunga sa nasudnong kasilag ug panghimaraot. Maong nidangop si Estrada sa kinaham nga lutsanan sa mga naapiki nga naaktohan nga nagkabulingit sa lapok: Ang pagpasamot sa kalubog sa palibot pinaagi sa pagpanlabay og lapok ngadto ni bisan kinsa uban ang panghinaot nga may matsambahan nga maigo ug mapitlan sa lang-og nga lapok.

***

Mao ra ba ni labing maayong depensa nga atong mapaabot gikan sa mga gilambigit sa P10 bilyones nga eskandalo sa pork barrel:

-Pagpa-goryo-goryo nga mahimong gi-peke ang ilang mga pirma ug nga wa silay kasayuran tinuod bang mga tawo o kinopya ba lang nga mga ngan gikan sa telephone directory ug resulta sa board examinations ang nakapahimus sa pork barrel?; ug

-Pagpasumbingay nga kawatan sila apan mahimong kawatan sang mga namasangil nila.

***

Email: [email protected]