Echo mopirma sa Viva

CEBU, Philippines - Gikatahong mopirma og kontrata karong adlawa si Jericho Rosales sa Viva Films. Gipanglantawan nga madayon na gyud ang gidungog nga pelikula nila sa iyang ex-girlfriend nga si Heart Evangelista.

Anne nakabentaha

Matud pa ni Anne Curtis nga dako kaayo og bentaha nga dili artista ang iyang uyab nga si Erwan Heusaff hinungdan nga nagpabilin gyud nga lig-on ang ilang relasyon sanglit layo man sila sa mga intriga.

JM nagpa-rehab?

Gihugon-hugon nga nagpa-rehab diay ang aktor nga si JM de Guzman ug matud pa hapit na kini nga mogawas. Giingong interesado  mokuha kaniya ang GMA-7 sa higayon makagawas na kini sa rehabilitation center.

Supportive ang boyfriend

Gikuyogan ni Dingdong Dantes ang iyang uyab nga si Marian Rivera sa presscon sa pelikulang Kung Fu Divas nga gipahigayon sa ABS-CBN compound sa miaging gabii.  Suma pa ni Dingdong nga mohatag gyud siya og todo nga suporta sa pelikula sa iyang uyab.

Amy mibiya sa TV5

Pormal na  nga  mibiya si Amy Perez sa TV 5  human sa pipila ka tuig nga pag-istar sa maong network. “ TV5 respects the decision of Ms. Perez to leave the Network due to personal reasons. She had been a valuable talent of TV5. We wish her well and the best of luck in all her endeavors,” tipik sa official statement sa maong network.

Yasmien andam magpa-sexy

Interesado na si Yasmien Curdi nga mo-pose  og sexy magazine gumikan dili na niya ikauwaw ang pamorma sa iyang lawas. Kung mahatagan og tsansa, gusto ni Yasmien nga mo-pose sa Rouge maga­zine.

Heart nakadawat na sa kamatuoran

Matud pa ni Heart Evangelista nga gusto na niya nga malikay sa mga kagubot hinungdan nga dili na niya ipamugos si Sen. Chiz Escudero ngadto sa iyang mga ginikanan. Matud pa sa aktres nga wala’y makatumpag sa relasyon nila sa senador bisan wala kini mauyoni sa mga minahal niya sa kinabuhi.

Gilikayan nga pangutana

Gipadayag ni Vhong Navarro nga maabi-abihon gyud siya sa mga reporter apan usa lang ka topic ang dili niya puwede tubagon. Kini mao ang kabahin sa iyang lovelife. Suma pa ni Vhong nga dili taga showbiz ang iyang girlfriend ug dili siya gusto nga magsagubang kini og mga isyu.

Ai-Ai nag-sorry sa presidente

Si Ai-Ai delas Alas na lang ang nangayo og pasaylo ngadto kang Presidente Noynoy Aquino gumikan sa lenggua sa kampo sa kanhi niya bana nga si Jed Salang nga matud pa nanginlabot ang presidente sa dagan sa ilang kaso. Suma pa sa komedyanteng aktres nga imposible kaayo ang maong akusasyon gumikan kay daghan kaayo og problema nga  giatubang karon sa presidente nga angayan hatagan og pagtagad niini.