Molupyo sa Linao, Talisay mireklamo sa basura

CEBU, Philippines - Nagbagulbol ang  mga residente  sa sitio Lea, barangay Linao, dakbayan sa Talisay  bahin sa mga basura nga  gilabay  sa usa ka bakanteng luna nga giabangan sa pamilya nila ni Kapitan Ofelia Ylanan aron himuong basketball court.

Usa sa mga residente nga si Leny Trazona mibutyag sa Banat News kagahapon nga usa ka semana  ang  maong  mga basura  nga gitam-ok  sa nahisgutang luna.

Miingon  siya  nga  mikapin sa 20 ka mga residente sa lugar ang naapektohan  tungod sa kaabog niini.

Matud ni Trazona nga ang gipanglabay nga basura  gilakipan  sa  fiber glass, mga plastik, karton ug giingong  baho   usab  kini.

Kini tungod  kay  mga ginuba  gikan sa barko   busa  mga tayaon  ang  maong  mga  linabay.

Gipasabot ni Trazona nga kung “filling material” lang ang itam-ok  sa maong lugar walay problema apan naapektohan sila tungod kay inig hangin manglupad ang mga abog, dala  ang fiber glass ug katol usab  kini nga motugpa sa panit.

Gawas pa niini ang maong lugar agianan paingon sa eskuwelahan ug aduna  usay mga manguykoy   sa maong  mga  basura.

Dugang ni Trazona nga usa sa mga residente  sa maong lugar  giingong mipahibawo na sa kapitan apan giingong wala pa gyud ipahakot  sa kapitan  ang maong mga basura.

Sa laing bahin, ang Banat News mitawag kang Kapitan Ylanan kagahapon aron makuhaan kini og pamahayag bahin sa maong isyu apan ang nakatubag sa tawag mao ang iyang bana nga si city councilor Val Ylanan.

Kini tungod kay ang kapitana   nagpahigayon og team building tali sa iyang mga kagawad ug Barangay Health Workers (BHW).

Si Konsehal Ylanan miangkon nga ang nahisgutang luna ilang  giabangan aron himuong basketball court ug nagkinahanglan kining abunohan pa tungod kay lupa.

Gibutyag sa konsehal nga adunay dump truck nga gikan sa dakbayan sa Sugbo nagkarga og mga ginuba sa barko diin ilabay unta kini ngadto sa landfill sa barangay Tapul.

Matud ni Konsehal Ylanan nga ang maong mga ginuba magamit kining abuno  sa maong luna hinungdan nga gihangyo niya ang drayber sa truck nga anha itam-ok ang mga ginuba nga semento ug uban pang mga materyal nga gikan  sa barko.

Ug gani matud ni Konsehal Ylanan nga gitanyagan pa niya ang drayber sa truck nga naghakot nga hatagan og pahalipay nga P200 matag truck nga maabuno.

Apan gipasabot ni Ylanan nga ang ilang sabot nga itam-ok diha sa lugar kadtong mahimong filling material ug dili mga basura.

Matud ni Ylanan nga ipasusi dayon niya kini ug kung mapamatud-an nga lakip sa gitam-ok  ang mga basura   nga makadaot sa panglawas sa mga tawo, ipahunong niya kini  ug pabantayan og tanod ang lugar aron dili na malabayan   og  hugaw  ang  maong  luna. (/WC) (BANAT NEWS)