Polis nga nagdawata’g duha ka sweldo giimbestigar

CEBU, Philippines - Gipaubos sa imbestigasyon ang usa ka polis sa Talisay nga close-in security sa mayor sa siyudad kabahin sa isyu nga nagdawat kini og duha ka suhulan gikan sa gobiyerno o double compensation.

Si Supt. Resty Santos, officer-in-charge sa Talisay City Police Station nga nahinabi sa mga tigbalita nagkanayon nga human niya mahibaw-i ang nahisgutangg report gipaimbestigar dayon niya ang nahisgutang polis. Matud ni Santos nga mihimakak ang nahisgutang polis kay giingong allowance lang ug dili sweldo ang iyang nadawat gikan sa kagamhanan sa siyudad.

Si Santos nagkanayon nga kung mapamatud-an nga nalambigit sa double compensation ang maong polis kinahanglang iuli niini ngadto sa siyudad ang nadawat niining sobrang sweldo aron dili kini mapasakaan og kasong administratiba.

Sa pagkakaron ang nahisgutang polis wala tangtanga isip close-in security escort sa mayor.

Dugang ni Santos nga gipahimangnoan niya ang iyang mga sakop ilabi na kadtong nadestino isip mga close-in bodyguard sa mga VIP nga mokunsulta una ug dili magpataka og pirma sa ihatag ngadto kanilang mga allowances aron dili kini masugamak sa problema. Kahinumduman nga ang maong polis giingong apil kini sa payroll sa city hall sa Talisay isip confidential assistant ubos sa quota sa mayor. Ang matag confidential assistant magdawat kini og P500 nga sweldo matag adlaw.

Ang hepe sa Department of Interior and Local Government (DILG) sa Talisay nga si Celerino Magto Jr. nagkanayon nga posibleng mapasakaan og kasong administratiba ngadto sa Ombudsman ang maong polis kung mapamatud-an nga nagdawat kini og doble sweldo sa gobiyerno o na-double compensation kini.

Apan kung ang maong gidawat sa polis allowance lang kini wala siya’y tulobagon.( /EIM) (BANAT NEWS)