Pinutos pagkaon gipanghatag sa DSWD7

CEBU, Philippines - Ang Department of Social Welfare and Development (DSWD-7) bag-ohay lang mitunol sa  kapin  sa  8, 184 ka family food packs alang sa 2, 728 ka apektadong pamilya sa oil spill sa kabarangayan sa lungsod sa Cordova.

Sa nasayran daghang mga barangay ang naapektohan human   malunod   ang  M/V St. Thomas Aquinas niadtong miaging Biyernes sa gabii. Kini  miresulta  sa pag-awas sa asayte  ug  krudo gikan sa maong barko.

Kasagaran sa mga naapektohan nga pamilya mao ang mga mangingisda   kansang  panginabuhi  sa kadagatan  nahunong  tungod sa oil spill.

Matud pa ni DSWD-7 Regional Executive Director Mercedita Jabagat nga nakig-alayon gilayon sila ni Congressman Luigi Quisumbing, mga Local Government Unit sa lungsod sa Cordova ug uban pang nagpakabanang nasudnon nga ahensya sa gobyerno aron makunhoran ang epekto sa maong aksidente.

“However, our resources is also limited so we are calling private individuals and businessmen to donate goods for the affected fisher folks,” kini matud pa ni Jabagat.

Sumala pa ni Jabagat nga ang mga de lata, bugas, ug mga bottled water lakip na ang mga galamiton alang sa pagpagawas og hugaw maoy gihatagan og prayoridad nga ipanghatag sa ilang buhatan.

Gibutyag ni Jabagat nga ang mga donasyon mahimong ihatud  sa buhatan sa DSWD-7 nga makita sa eskina sa  M.J Cuenco and General Maxilom Avenue, siyudad  sa Sugbo.

Kinsa  kadtong adunay donasyon pangitaon lamang si Jennifer Abastillas,Disaster Risk Reduction Management (DRRM) Focal Person. (/WC) (BANAT NEWS)