Bangkaruti?
Taliwa sa mga kabalaka nga way igong pundo ang dakbayan pagtubag sa mga obligasyon niini, ang mga sakop sa konseho mipatawag sa mga sakop sa Local Finance Committee sa dakbayan aron sutaon unsay tinuod nga kahimtang sa panudlanan sa syudad.
Inay patuyangan ang kabalaka ug way sukaranan nga mga tabi-tabi, gitinguha unta sa mga konsehal sa dakbayan nga direktang matubag ang daghang mga pangutana ug katahap pinaagi sa mga opisyal mismo nga dunay igong kasayuran maylabot sa tinuod nga kahimtang sa atong panudlanan.
Apan inay tungahon ang konseho ug daygan sa tinuod nga kahimtang, mas gipili sa mga sakop sa executive department ubos sa kamanduan ni Mayor Michael Rama nga pasagdang magpadayon ang mga pagduda ug intriga.
Wala tugoti sa mayor nga motambong sa session sa konseho ang iyang mga department heads nga naglangkob sa LFC. Dili sila gustong moatubang sa public hearing tungod sa rason nga wala pa kuno niya masubmitir ang iyang budget sunod tuig ug ang iyang supplemental budget alang karong tuiga.
Ambot unsay labot sa iyang budget sunod tuig sa pagpatim-aw sa iyang mga sakop didto sa konseho aron motubag sa mga pangutana? Kun way gitagoan ang mayor nganong dili man niya tugotan nga tubagon sa mga sakop sa LFC ang mga pagduda nga natilok na hastang katapusang sinsiyo sa panudlanan sa dakbayan?
Kun tinuod nga daghan og kwarta ang dakbayan, nganong naglisod man siya pagpanuweldo sa tanang kawani? Nganong dunay mga job order employees sa City Hall ang gikatahong wala pa ma sweldohi? Nganong hangtud ron wala mabayri ang mga tunghaan diin tua magtungha ang mga scholars sa dakbayan? Nganong hangtud ron nagsigi pa man og paningil ang mga senior citizens sa ilang financial assistance? Nganong hangtud ron daghan sa mga suppliers sa dakbayan ang wala pa mabayri? Ug nganong hangtud ron dili niya maduso ang supplemental budget aron maaprobahan sa konseho?
Dili kaha tungod kay dili siya makakuha og certification sa city treasurer pagsiguro nga dunay available nga pundo alang sa supplemental budget? Dinalian ang supplemental budget tungod kay matud sa General Services Office nga kun walay pundo nga moabot hangtud sunod buwan wala nay gasolina ang mga sakyanan sa dakbayan. Dili na sab ta mamahimong makalabay sa atong basura didto sa usa ka pribadong landfill sa Consolacion tungod kay wala nay kwarta nga ikabayad. Apan taliwa sa kadinalian sa panginahanglan, nganong hangtud ron wala pa niya iduso ang supplemental budget didto sa konseho?
Ang report sa Commission on Audit niingon nga pagtapos sa miaging tuig ang dakbayan dunay overdraft nga dul-an sa usa ka bilyon ka pisos. Buot ipasabot nga mas dako og obligasyon ang dakbayan kay sa pundo niini.
Obligasyon sa mayor nga iyang itug-an sa publiko ang tinuod nga kahimtang sa panudlanan sa dakbayan.
* * *
- Latest
