EDITORYAL - Komplikasyon diha sa ICC

Ang pagsige og insister sa mga supporter ni kanhi presidente Rodrigo Duterte nga wala nay hurisdiksyon ang International Criminal Court sa Pilipinas nakahatag hinuon og komplikasyon aron mahatagan siya og interim release tungod kay ni-withdraw na sa Rome Statute ang Pilipinas.

Ang tigpamaba sa ICC, Fadi El Abdallah sa interbyu sa GMA miingon nga aron mahatagan og interim release si Duterte kinahanglang ilhon pagbalik sa gobiyerno sa Pilipinas ang hurisdiksyon sa ICC.

Apan lisud na kining buhaton karon  kay mismo si Duterte ang nangusog maong nigawas sa Rome Statute ang Pilipinas niadtong 2019.

Gialegar nga paagi unta kadto ni Duterte aron dili siya magukod sa ICC kay ang mga kabanay sa mga biktima sa war on drugs nidangop didto  kay nawad-an na sila og pagsalig sa hustisya sa nasud ubos sa iyang pamunoan.

Apan gikan November 1, 2011 sa pagsulod sa Pilipinas hangtud Marso 17, 2019 sa dihang nigawas kini sa ICC, duna silay hurisdiksyon sa nasud. Mao kini ang rason kun nganong niisyu og warrant of arrest ang ICC batok kang Duterte.

Ang tigpamaba sa Palasyo nga si Claire Castro nakamatikod sa komplikasyon kay wala na gitahod sa gobiyerno ang ICC karon. Gani, mismo ang mga anak ni Duterte nidangop sa Korte Suprema ug mi -awhag nga did-an ang gobiyerno pagkooperar sa ICC.

Laing komplikasyon niini, kun ilhon og balik sa Pilipinas ang hurisdiksyon sa ICC, posibleng kinahanglang kini mosanong sa maong korte ug posibleng usa niini ang pag-freeze sa tanang assets sa mga Duterte.

Ang kanhi pangulo kinsa nagsaulog sa iyang ika-80 nga adlaw nga natawhan kagahapon, na-detain sa ICC Detention Center tungod sa kasong crimes against humanity may labot sa iyang drug war nga basi sa rekord sa gobiyerno 6,000 ang napatay, apan ang mga human rights groups miingon sobra 30,000 ang gipatay adtong panahona.

Sa laktod, bugtong makatabang aron mahatagan og interim release si Duterte mao ang pagbalik sa Pilipinas sa ICC, apan kinahanglan sa gobiyerno mokooperar sa imbestigasyon batok kaniya.