Mayor Garcia mapasigarbuhon sa kalamposan sa Sinulog 2025
CEBU, Philippines — Gikalipay ni Cebu City Mayor Raymond Alvin Garcia nga malampuson gyud ang pagsaulog sa Sinulog 2025 kun diin gitapos ang kasaulugan pinaagi sa Sinulog Grand Ritual Showdown sa Cebu City Sports Center.
“I will always say this that this is the biggest, the grandest, the liveliest, and the most colorful Sinulog, but of course, it is not perfect,” padayag pa ni Garcia atol sa press conference kagahapon sa Cebu City Hall.
Gisaysay sa mayor nga adunay pipila ka mga kakulian nga nasinati gyud atol sa programa sama sa kahuot sa dagan sa trapiko ilabi na inig gawas sa mga contingents.
Dugang pa nga adunay mga floats nga nagka-aberya mao nga maglisod og pagpadayon sa dagan sa trapiko sa parada pa lang daan.
“There are what we call unforeseen circumstances nga wala ta makabantay. But we always look at it as a learning experience para by next year we will have a lot of changes and improvements,” suma pa sa mayor.
Sa sunod tuig, kung siya pa gihapon maoy mahimong mayor sa syudad, magpa-andam na siya og tow trucks aron nga kun adunay aberya, mas mapadali ang pagrespondi.
Mapasalamaton sab si Garcia sa tanang dili momenos upat ka milyon nga mga Sugbuanon nga nakisaulog sa Sinulog sa CCSC.
“By far, this is the largest number of spectators in the history of Cebu City. Mga uhaw man gyud kaayo ang mga Sugbuanon nga makatan-aw og Sinulog. Dagsa gyud kaayo ang mga tawo. Overwhelming gyud kaayo ang mga tawo nga niari sa Cebu City nga nigawas ug ni-celebrate sa Sinulo,” suma pa ni Garcia. (BANAT NEWS)
- Latest
