Inamahan unta nga pagdesiplina nga wala sa lugar

Taliwala sa kalamposan sa Pasigarbo sa Sugbo 2024 mao usab ang kasikas nga adunay kalambigitan sa mga contingents sama nalang sa usa ka polis nga nanagmal og mga propsmen sa contingents sa lungsod sa Compostela nga nisangpot sa pagkasikop sa usa ka polis nga gisangonan unta nga maoy mopatuman sa kahapsay ug kalinaw sa ilang grupo ug ang maong pulis ang moprotehir pud sa mga contingents nila kay siya man ang embedded policeman nila.

Nagsugod ang tanan dihang nangayo og tabang ang choreographer sa polis aron mopatuo ang mga naglangkob sa ilang perfomance alang sa ilang formation sa besperas sa Pasigarbo sa Sugbo. Apan tungod seguro sa ka gahi sa ulo sa mga batan-on nahutdan sa pasensiya ang polis ug didto na nabakyaw niya ang iyang mga kamot ug nadapatan gyud ang siyam ka mga propsmen diin upat kanila mga menor de edad.

Nakuhaan og video ang pagbunal sa policssa kamot sa mga biktima nga daw amahan nga nagdesiplina sa iyang mga anak nga nagpabadlong nga mao hinuoy nakapasugamak kaniya ug sa iyang pagka polis kay siya naman ang gireklamo ug gidakop sa iyang mga kabaro'ng polis ug gitanggong samtang gihikay na ang kasong physicial injuries ug child abuse.

Bisan og wala magpa-interview ang polis apan makita nato ang iyang tumong ug tuyo nga madesiplina ang mga batan-on aron usab seguro nga magseryoso kini kay tinguha gud nila nga modaug sa Pasigarbo sa Sugbo maong dili pwede ang magpabadlong. Maayo seguro ang iyang tumong apan duna may balaod nga nagproteher sa katungod sa mga tawo ilabi na sa mga menor de edad.

Nagpadala man gud ang polis sa iyang gibati nga kalagot o ba kaha iyang garbo niadtong higayonan nga wala motuo kaniya ang mga propsmen maong mihimo siya og butang nga iyang gimahayan karon kong nagmahay man siya. Angayan hinumduman niya nga wala siyay katungod nga modapat sa uban, sultihan o maymayan niya dili pasakitan kay sa tinuod lang kining mga edara hilabihan gyud ka mga garaon ang batasan ug gahi gyud badlongon.

Desidido ra ba gyud ang mga ginikanan sa mga nadapatan sa pulis nga tinud-on sa pagpasaka og kasong kriminal, samtang lahi usab ang kasong administratiba nga makaguba gyud sa iyang pagkatawo. Ang lokal nga kagamhanan sa Compostela mipasalig nga suportahan ang mga biktima nga gipaubos na gani sa psycho social intervention kay posibleng nakamugna kini og trauma kanila, labaw na kong mopasaka gyud og kaso aron makab-ot ang hustisya.

Leksyon kini sa mga tawo nga mohimo og mga butang samtang anaa sila sa kasuko o gipatigbabaw ang garbo, dili na makahunahuna og mayo. Ulahi na nga makamatngon nga dili diay maayo ang resulta, sama sa polis nga feeling niya amahan sa mga contingents niadtong tungora ug iyang gidesiplina kay mga gahig ulo apan siya na hinuon ang nahimong kontrabida sa kauwahian. Sa tinuod lang bisan gani tinuod nga amahan suklan man gani sa mga anak kong masobrahan na sa pag gamit og kusog sa pagdesiplina sa anak.