Tabunok flyover sirad-an sud sa 48 ka adlaw

CEBU, Philippines - Sirad-an sulod sa 48 ka adlaw ang Tabunok flyover sa Dakbayan sa Talisay sugod karong Marso 18 hangtud Mayo 5 niining tuiga.

Gipahibawo ni Leslie Anthony Molina, ang district engineer sa Cebu Second District Engineering Office sa Department of Public Works and Highways nga ayuhon ang expansion joints sa maong flyover. Matud ni Molina sa iyang press statement, nga ang bahin sa Natalio Bacalso Avenue sirad-an usab sugod alas 8 sa gabii hangtud alas 4 sa buntag.

Ang First Grandeur, Inc. mao ang mohimo sa maong proyekto.

Dugang pa ni Marie Nillama, ang information officer sa DPWH-7 nga bakbakon usab ang aspalto sa maong flyover kay daghan na kini og liba-ong ug human niini ilisan ra usab kini og bag-ong aspalto.

Ang Tabunok flyover mao ang labing unang flyover sa Sugbo nga gitukod niadtong tuig 1992. Aduna kini gitas-on nga 249 linear meters.

Gibana-bana nga P8 milyones ang gasto sa pagpaayo niini matud pa ni Nillama. (BANAT NEWS)