4 kapitan sa Talisay gipanid-an
CEBU, Philippines - Upat ka kapitan sa siyudad sa Talisay ang gipanid-an sa kapulisan gumikan sa mga report nga nalambigit sila sa operasyon sa ginadiling drugas sa ilang mga barangay.
Si Supt. Emerson Dante, pangu sa Talisay City Police nitug-an nga aduna gani usa kanila nga niduol ug makig-settle sa ilang subsub nga kampanya sa ilegal nga drugas niadtong miaging buwan.
Sumala pa ni Dante kun nipaak lang unta kadtong opisyala sa entrapment hayan nadakpan gyud kini.
Matud pa ni Dante sukad nga gihunong ang Oplan Tokhang nihunong ‘sab ang maong kapitan sa pagsuway og suborno kaniya.
Ang Philippine Drug Enforcement Agency (PDEA) daan nang nipahibalo nga tulo ka kapitan sa maong siyudad ang naa sa ilang listahan nga ilang gimonitor.
Apan si Dante niingon nga dili lang kini tulo kundi upat kini sila nga may kalambigitan sa ilegal nga drugas.
Sumala pa niya, ang kapulisan sa Talisay mopadayon gihapon sa ilang intelligence operations pagpaniid sa mga tawo nga nalambigit sa ilegal drugs nga ilang ipadangat ngadto sa PDEA. (BANAT NEWS)
- Latest
