Mga Martinez nahulga sa kandidatura ni Benhur Salimbangon - Sanchez

Tataw na kaayo nga nahadlok ug gipanguyawan ang mga Martinez diha sa ikaupat nga distrito sa probinsya sa Sugbu labot sa kandidatura ni kanhi bokal Benhur Salimbangon kinsa magpapili sa pagka-Kongresista karong piniliay sa Mayo 14 ning tuiga.

Kini maoy gipadayag ni Bise Gobernador Gregorio Sanchez labot sa pagkwestyon karon ni kanhi kongresista Celestino "Junie" Martinez Jr., sa voters list ni Salimbangon nga wa marehistro sa lungsod sa Medellin.

Samtang karong bag-o matud pa nga gipagawas sa mga kaatbang sa politika ni Salimbangon nga gimani-obra sa taga commission on elections ang voters list niini hinungdan nga narehistro kini diha sa lungsod sa Daanbantayan.

Gipanalipdan ni Bise Gobernador Sanchez si Salimbangon nga wala sa pagkatawo niini ang pagpanglingla sa katawhan kini tungod kay usa kini ka professional nga engineer, matinud-anon nga negosyante.

Si Bise Gobernador Sanchez miingon nga ang klarong pagkasulti si "Junie" Martinez, nahadlok ni Benhur nga mapildi ang iyang anak nga si Bogo Mayor Celestino "Tining" Martinez lll kinsa maoy kaatbang ni Salimbangon karong eleksyon kini tungod kay nakita niini nga hayag na ang kadaugan ni Salimbangon base usab sa pagsuporta sa upat ka mga lungsod sa ikaupat nga distrito ug ubang mga opisyal.

Kahinumduman nga ang mga kadagkuan sa Comelec sa lungsod sa Daanbantayan mibutyag nga gumikan sa ilang gubaon nga computer system wa mabutang ang pangan ni Salimbangon sa voters list sa 2007 diha sa nahisgutang lungsod.