Duha ka dancer nga tinun-an gidunggab

Duha ka batan-on tinun-an sa high school nga mga dancer ang nangalandig sa tambalanan human sila panunggaba sa pundok sa mga batan-on nga gituuhang mi-tripping kanila diha sa eskina sa dalan C.Padilla ug Abella sa San Nicolas duol sa ilang tunghaan niadtong milabay'ng hapon.

Ang nangasamdan giilang sila si Michael Boro,22, tinun-an sa fourth year sa Gothong National High School ug residente sa sitio Nazareth sa Buhisan ug Jay Bryan Barera,21, tinun-an usab sa ikaupat nga tuig sa samang tunghaan ug residente sa Suba.

Ang gitumbok nga midunggab sa duha giilang si Rafael Abella,25, minyo ug duha ka wala mailhing mga kaubanan.

Sumala pa sa mga biktima naglakaw sila padulong sa San Nicolas Church aron mag-practice og sayaw dihang gibabagan sa mga suspek ug walay daghang pangutana gipangkulata sila niini dayong dunggab kang Boro diha sa likod.

Human kang Boro si Barera na usab ang giatubang sa mga suspek, apan si Barera daling nipunit sa kutsilyo sa naninda og tempura aron ipanalipod sa iyang kaugalingon.

Apan wala mabantayi sa biktima nga usa sa mga suspek ang milibot sa luyo ug kalit nga mihansak diha sa iyang likod, ang mga suspek daling miikyas sa dapit samtang ang duha ka tinun-an daling gidala sa Cebu City Medical Center diin sila gipagawas ra dayon tungod kay luwas na sila sa peligro.

Matud pa sa mga biktima niadtong Marso 6 giduol sila sa mga suspek ug gihingian og kwarta apan wala nila kini hatagi hinungdan nga nangasuko ang grupo sa mga suspek.-Edwin Ian Melecio