Xray issue sa CCMC 'sugda'g imbestigar

Pormal nang buksan ang imbestigasyun sa City Attorneys Office sa siyudad sa Sugbu batok sa nakontrobersyal nga kwestyonabling pagpamaligya sa mga X-ray film sa Cebu City Medical Center (CCMC).

Si Assistant City Attorney Joseph Bernaldez , chairman sa Employees Management Committee on Investigation (EMCOI) mitakda sa Marso 23 alang sa fact-finding investigation sa maong kontrobersya.

Usa sa ipatawag atol sa maong imbestigasyun mao ang hepe sa CCMC Dra. Myrna Go aron sukitsukiton kini kabahin sa nahitabong kontrobersya.

Nasayran nga giduso na usab ni Go ngadto sa buhatan sa City Attorney's Office ang iyang tubag sa suwat nga gipadala kaniya sa maong buhatan kabahin sa maong kaso.

Hinuon nagdumili pagtug-an si Bernaldez kun unsay punto ni Go sa iyang walo ka pahina nga tubag.

Matud ni Bernaldez nga gitun-an pa karon nila ang maong tubag ni Go ug ingon man ang uban pang mga kawani sa maong publikong tambalan nga i-apil sa pagpatawag atol sa maong fact, finding investigation.

Matud ni Bernaldez ang resulta unya sa maong himoon nilang pakisusi maoy magsilbing basihanan alang sa posibleng pagrekomendar nila ngadto kang Mayor Tomas Osmeña kun angay bang pasakaan og kasong administratiba ang mga hingtungdang opisyal ug kawani sa CCMC.

Napublikar ang maong kontrobersya dihang dunay pormal nga mireklamo kabahin sa pagpamaligya sa mga X-ray film sa CCMC nga wala ipaagi og bidding ug uban pang mga proseso sa gobyerno pag-dispose sa mga butang niini.