Tomas nanghatag kopya sa utang sa Cebu SOC sa fireworks

Tungod sa nagkaduol nga mga adlaw sa eleksyon karong Mayo misugod na usab ang pagbukal sa politika dinhi sa dakbayan sa Sugbu.

Kagahapong adlawa atol sa press conference ni Mayor Tomas Osmeña subli niyang gibanhaw ang mga pamasangil sa kontrobersya ngadto kang kanhi Cebu City Sports Commissioner Jonathan "Atan" Guardo may labot sa kapakyas niini paghatag og liquidation sa kinatibuk-ang nagasto sa milabay'ng 23rd SeaGames diin si Guardo maoy chairman sa Cebu Sea Games Organizing Committee.

Mi-apod-apod og kopya si Osmeña ngadto sa mga tigbalita kabahin sa kapakyas pagbayad sa CebuSoc sa P81,770 sa mga fireworks nga gigamit atol sa opening sa SeaGames niadtong petsa 25 sa Nobiyembre sa nilabay'ng tuig.

Matud ni Osmeña nga ang paglansar ni Guardo pagka- kongresista sa south district atbang ni kongresista Antonio Cuenco nga sakop sa BOPK maoy hinungdan nga wala kini mohatag og kompletong husay sa tanang nagasto sa milabay'ng SeaGames.

Apan dali kining gitubag ni Guardo sa press conference usab niya kagahapon.

Gipasabot ni Guardo nga dili tinuod nga wala siya makahatag og husay sa nagasto sa milabay'ng SeaGames tungod kay na-liquidate niya ang P10 milyones nga gihatag gikan sa National Organizing Committee alang sa maong kalihukan.

Gitug-an ni Guardo nga gani nakatapal pa siya og dulan P1 milyon gikan sa iyang personal nga salapi tungod kay na-short ang mao nilang budget tungod sa sobrang gastuhan.

Giangkon ni Guardo nga dunay mga catering services ug apil na ang maong supplier sa mga fireworks nga wala na nila mabayri tungod kay wala na mopaigo ang gahin.

Gipasaligan ni Guardo nga ilang bayran ang maong obligasyon sa higayon nga i-release usab sa Philippine Sports Commission ang dugang P1.8 milyones nga gipasalig niining itapak sa na-short nga budget sa milabay'ng Asean summit.

Nagduda si Guardo nga si Kongresista Antonio Cuenco maoy nagpaluyo niining pagbanhaw karon sa mga karaan nang isyu tungod sa iyang tinguha nga pagpakig-atbang niini.

Giawhag ni Guardo si Osmeña nga dili mag-apil apil ug pasagdan silang duha si Cuenco nga maoy mag-atbang sa umaabot piniliay.