Ang Hari

Maayong Balita

Nobiyembre 24, 2024: Solemnidad ni Kristong Hari

Mga Pagbasa: Dn. 7;13-14/Sal. 93/

Gip. 1;5-8/Jn. 18;33b-37

Pagpamalandong Matag Domingo

Atubangan ni Pilato si Jesu-Kristo nagbarog nga nag-inusara nagpaabot sa mahimong hukom batok kaniya gumikan sa mga nagkadaiyang mga pasangil nga kun buot hunahunaon nagasukad lamang sa kasina sa mga kaparian ug sa mga magtutudlo sa balaod batok ning Diosnong Magtutudlo. Apan diha sa kalumo ug pagtahan sa kaugalingon si Jesus nibarog nga walay kahadlok batok sa iyang mga kaaway. Ug bisan sa ilang kapintas wala siya mohimo og bisan unsang lakang sa pagsukol.

Kasinatian

Lisud ang panahon karon. Mapintason ang mga tawo. Buot mamahimong labaw sa tanan ang si bisan kinsa ug buot sila nga mamahimong hari sa tanan.

Hari nga wala magasukad sa pagpaubos kondili sa garbo ug pagpanghawod.

Mga tawo nga buot mogamit sa ilang gahom aron uliponon ang tanan. Mga tawo nga buot mopahimulos sa bisan unsang anaa aron lamang sila malipay.

Aduna pa ba kahay mga tawo nga sama ni Kristong Hari nga nagtan-aw sa panginahanglan sa uban imbis sa kaugalingon lamang?

Lihok

Pagpaubos ug likayi ang pagbutang sa imong kaugalingon sa kinatas-ang dapit.

Pangamuyo

Tanan: Ginoo himoa kaming sama kanimo nga mapaubsanon ug maalagaron, maawat unta namo ang imong sanglitanan. Ikaw nga buhi ug hari hangtud sa kahangturan. Amen.