Mamugnaong taming ug mihunong pagtuyok ang kalibutan

CEBU, Philippines - Daw katulgon pa si Elvie nga nagmaneho sa iyang sakyanang AUV padung sa amihanang Sugbo. Aron pagsanong sa usa ka text message nga iyang nadawat sa miaging adlaw, mi abiso siya sa iyang sekretarya nga wa siya niining adlawa isip Executive Vice President for Finance and Administration sa development company nga gipanag-iya sa iyang mga ginikanan. Sayo sa buntag siyang mibiya sa ilang panimay. Ang yamog sa sayong kabuntagon nagpamilit pa sa windshield samtang misubay siya sa highway diin nanagbarog ang mga dagkong punoan sa gemelina ug acasia sa isig ka kilid niini.

Aron pagwagtang sa iyang duka, mi tune-in siya sa FM station diha sa may dashboard. Apan maoy nasawod sa iyang mga dunggan ang mabugnaw’ng tingog ni Nat King Cole nga sikat niadtong dekada 60. ...Our love affair is a wondrous thing. That we'll rejoice in remembering. Our love was born with our first embrace. And a page was torn out of time and space...

Kalit namalik sa panumduman ni Elvie ang mga kagahapon tali nila ni Roel, ang kanhi niya hinigugma. Mga kagahapon nga kun siya pa lang ang pagbut-on di gyud niya palabyon. "Apan way ugma nga di moabot. Labi pang way kagahapon nga di molabay," ni Elvie pa sa hilum.

 "Elvz, kun balaod man sa Diyos nga di ta magkadayon, dawaton lang nato ang tanan. Unsaon man gi-uwang man ta sa gahom nga maoy nagtukmod nato sa lain-lain tang kahimtang...ang gahom sa bahandi. Mao nga di ko madawat sa imong mga ginikanan," daw nanagingting pa sa iyang mga dunggan kining mga pung pagmahay ni Roel.

"Dayon na siya'g pa sentimental uy! Sagdi lang gud, matod pa bitaw ni Shakespeare mas maayo pa sa tawo nga nahigugma apan napakyas kay sa wa gyud siya makasuway paghigugma," tubag ni Elvie kang Roel.

 ...Our love affair may it always be. A flame to burn through eternity. So take my hand with a fervent prayer. That we may live and we may share. Our love affair to remember... "Elvz, gikan karon ug hangtod sa sunod natong panagkita, daghan pang panghitabo nga mosuway natong duha. Mga panghitabo nga wa tay gahom pagkontrolar. Tingali ma in love ka ra sa lain. Kana bang mosibo sa gusto sa imong mga ginikanan. Ug ako sab, lingawon ko lang ang akong kaugalingon pag pangita'g laing pares sa kinabuhi. Isip yano lang nga security guard sa inyong kompaniya, lahi ra kaayo ang atong kahimtang. Kun kita man gani ang magkadayon, tingali yam-id lang ug tamihid ang akong madawat kanunay gikan sa imong mga ginikanan. Apan timan-i ni Elvz, kun kinsa man gani natong duha ang unang kuhaon sa kahitas-an, please Elvz, maghinulatay ta ha didto sa laing kalibutan."

Ug nahiabot ra gyud si Elvie sa buot niya padulngan. Human niya gi park ang kotse, gisugat dayon siya sa asawa ni Roel nga si Maricel ug ang bugtong nilang anak nga lalaki nga nag edad pa'g duha ka tuig. Dungan silang mipaingon sa main gate sa sementeryo sa lungsod sa Colveta ug dayon mipontareya sa lubong ni Roel.

  "Elvz, sumad gyud nga ika-tulo ka tuig karong adlawa gikan sa pagtaliwan ni Roel," ni Maricel pa nga dungan ni Elvie paghad sa buwak nilang dala. "Maayo gani Elvz nga mipatalinghug ka sa akong text nimo nga mag-abot ta dinhi karong adlawa," sumpay ni Maricel agi'g pasalamat kang Elvie.

 Mituyhad si Elvie human sa hilum niyang mga litok pag-ampo. "Salamat kaayo Cil sa pagka masinabtanon nimo ha", ni Elvie pa. "Abi nimo Cil, naibog baya ko ninyong duha ni Roel kay bisan sa hamubo ninyong panag-uban gitugahan mo'g anak. Gisaw-an ninyo ang mga oras ug adlaw nga lunlon kalipay lang. Mao baya nay gipangandoy sa matag magtiayon, di ba Cil?"

 "Tinuod na Elvz," daling tubag ni Maricel. "Apan sayod kong ikaw ang tanan alang ni Roel. Ikaw ang tanan niyang mga damgo. Ikaw ang iyang kalibutan. Ikaw ang iyang anino," sumpay ni Maricel nga misugod na'g lugok ang mga mata sa luha.

"Di ikalimod nga si Roel buotang bana ug mapinanggaong amahan. Apan matag ginhawa niya ikaw ang mosulod sa iyang kasingkasing. Pagmata niya sa buntag ikaw ang unang binuhat nga mohadla sa iyang huna-huna. Matag gabii dayon niyang sira sa iyang mga mata ikaw ang molingaw sa iyang pangisip nga mohatod niya sa katulogon."

 Dihang nadungog ni Elvie ang tanan, daw miawop ang kahayag sa adlaw nianang buntaga.

Sa iyang pamatyag way bisan usa ka dahon sa tanom ug kahoy nga nag-alirong kanila nga milihok timaan sa bugnaw’ng huyop sa hangin. Ang asawa ni Roel ug ang bugtong nilang anak daw nahisama sa estatowa nga midumili pag sanong sa aghat sa palibot.

Alang kang Elvie kun ang kamatayon maoy bugtong dangpanan aron mahiuban niya sa hingpit ug way utlanan si Roel, palabihon pa niyang makabsan sa kinabuhi diha-diha dayon. Ug didto sa luna nga gitagana nila, ilang pagasaw-an ang mga halok ug gakos nga dugay ra kanilang gihikaw. Mga halok ug gakos diin una nilang natagamtaman ang matuod nga kahulugan sa gugma.

Sa pamatyag ni Elvie bisan ang mga gutlo midumili pag kabyon sa kamot sa orasan nunot sa dagan sa panahon. Ug niadtong tungora sa iyang galamhan, mihunong pagtuyok ang kalibutan. (FREEMAN)