Buhawi

(In memory of the freak tornado

in Minglanilla & Talisay, Cebu)

Tuliyok, tuliyok, hangin nga kusgan,

Wala’y sinugdanan, wala sa’y utlanan.

Niwasi sa mga atop, mga bongbong;

Wala’y nakahunahuna asa magpasilong.

Ang panahon padung pa sa ting-ulan

Apil ang mga bagyo sa pag-atiman.

Bisan sa ka-init sa adlaw, dili pasagdan

Mga nabarang estero, unsa-on man?

Lunop sa mga kadalanan mahilam-os;

Nibuswak tubig sa mga sapa gahaguros.

Ang paglahutay sa bunok sa ulan

Molutaw mokaylap sa pagbanggutan.

Susama ra sa buhawi sa atong kinabuhi:

Diba wala sad nato hingpit masinati?

Buta-bunggol, sulong-pasagad ugma damlag

Mamasin nga moha-um sa tulin’g pagdasmag.

Marlinda Angbetic Tan

(Dibuho ni Ramon Taguchi)