Mamugnaong taming: Ang Bali nga Pana ni Kupido

Ringtone sa cellphone ang nipukaw ni Leopoldo. Nitawag na iyahang kasabot. Nipasiplat si Poldo sa monitor sa iyahang computer. “Ui, alas-otso na man diay. Nakatagpilaw man diay ko samtang nakig chat sa akong kasabot.” Imbis nga tubagon, gi-texsan na lamang kini niya ug giingnan nga paingon na siya sa ilahang gikasabotan nga lugar.

“las nueve sa gabii. Sa park sa may simbahan.” Mao kini ilahang gikasabotan. Bisan gikan og duty si Leopoldo ug gikapoy na, gahinamhinam na siya nga makakita sa iyahang kasabot. Nasayod siya sa ka-peligroso sa paglakaw og gabii apan dili na siya makapaabot pa og buntag. Ganahan na gayud siyang makig-kita niini.

Dali-dali nga naligo si Poldo, nagsipilyo, namutang og pahumot, dayon nilakaw. Unang higayon nga magkita sila sa iyahang kasabot. Wala siya’y kabutangan sa iyahang gibati. Excited na siya.

Tungod kay taas-taas pa man ang oras, nidesisyon si Poldo nga magpampasaheroan na lang. Naatol usab nga nagpatukar og love songs ang iyahang gisakyan nga jeep. Wala gayud niya kapugngi ang kaugalingon nga makahinumdom sa iyahang nanglabay’ng mga relasyon. Nakabati siya og kasakit ug panlumo. Giusikan siya.

Sa katapusang relasyon ni Poldo, gihatag gayud niya ang tanan. Halos gibale-wala gani niya iyahang kaugalingon, iyahang pamilya ug mga higala, alang sa babaye nga iyahang gihigugma. Ang nakasakit kay gi-ilisan lamang siya niini. Lab-as pa gayud sa iyahang panumdoman ang mga panghitabo.

Paingon si Poldo sa iyahang gitrabahuan. Nakita niya si Melanie, ang iyahang hinigugma, nga gi-agbayan og usa ka lalake. Misalig man tuod siya sa iyahang uyab, apan wala niya kapugngi ang magduda. Nianang adlawa, nitrabaho si Poldo nga wala sa kaugalingon.

Paggawas gikan sa opisina, gi-contact niya ang hinigugma aron makigkita. Nangaon sila sa usa ka fastfood sa sulod sa mall. Didto gi-kompronta niya si Melanie.

Daw nahagba ang kalibutan ni Poldo sa nasayran. Samtang nanguyab pa siya kang Melanie, may lain na diay nga nanguyab niini— si Ronald. Sanglit pareho man daw sila nga importante alang kaniya, wala’y gisugot si Melanie. Apan sa paglarga sa laing nangulitawo, nakahukom si Lanie nga sugton si Poldo.

Pila ka adlaw pa lamang ang nilabay, nauli na ang karibal ni Poldo. Mao diay kadto ang ka-agbay niya. Matod pa ni Lanie, mas bug-at sa iyahang kasing-kasing si Ronald ug gisugot na usab niya kini. Wala’y nahimo si Poldo kundi buhian ang bugtong babaye nga iyang gihigugma. Niadtong panahona, nakahukom siya nga dili na gayud mahigugma pa.

Nakapanghupaw si Poldo sa iyang nahinumdoman. Gani, wala na niya nabantayi nga nalapas na diay siya sa parke. Nitunol siya sa plite, dayon nanaog. Molakaw na lang siya pabalik sa gikasabotang lugar.

Pag-abot, nabasahan ni Poldo ang text nga nagpaabot na kaniya and iyahang kasabot. Nagsuot daw kini og puwa ug naglingkod sa may bench nga duol sa suga. Nagpanglingi siya ug nipahiyom pagkakita niya niini. Dali niya kining giduol.

Pagkahuman na nila og istorya, nipauli na si Poldo, kuyog si Princess. Maanyag kaayo kini. Angayan kaayo kaniya ang pink nga ribbon nga iyahang gisuot. Wala gayud siya nasayop sa pagpili niini. Gikugos niya si Princess pasulod sa balay.

Si Princess ang iyahang pinakabag-ong iro. Usa kini ka puti nga chihuahua nga nakaplagan niya gikan sa usa ka forum. Tulo ka tuig na ang nilabay, human sa kasakit nga iyahang nahiaguman, naka-amgo si Poldo nga mas komplikado ang mahigugma og tawo. Sukad niadto, nakit-an niya ang bag-ong love of his life— ang mga iro.

Sa pagkakaron, aduna na siya’y usa ka labrador, duha ka Aspin ug si Princess. Malipayon na siya ug wala siya’y gimahayan. Nadawat na niya nga wala siya’y swerte sa gugma. Nadawat na niya nga lagmit nabali ang pana nga gitagana unta ni Kupido alang kaniya. Dibuho ni Ramon Taguchi