Sa Baybayon sa Ginatilan

(Gisuwat kini adtong adlaw nga mikuyog ako sa paghatod si anhing Capt. Bahinting sa Ginatilan)

Sayri ako nganong kaanindot ba sa imong lawod?

Tungod ba kay mihadla nimo ang bidlisiw sa kahaponon?

Maong, daw puwa ang kaganinang asul mong tubig.

Ambisyosa, bisan unsaon mo pag paibog nako.

Diha kara gyud kutob.

Di na ug di ka na gyud mausab.

Mousab man gani ang imong bulok,

Kuydaw, wagtangon gihapon kana sa kisdom sa panahon.

Apan pakpakan ko gihapon ang imong pahiyom.

Kay midulot kini sa latagaw kung tiil ug handurawan.

Ang hambugirang bukid sa Talinis mikamay.

Unya kalang.

Ang nag-ugdong suso sa Kanlaon, nagpanilap.

Paabot lang mo.

Yuna pa,kaatas na sa imong naabtan!

Sama sa convoy ni Bahinting, o mas pa.

Kay diha nagagikan kanimo

Ang usa ka Pilipino nga Santo.

Agwantaha ang akong pagdayeg nimo.

Kay sa dili madugay, anha na usab ako.

Balikon ko ang imong katahum,

Sama ka halang sa kinilaw nga gi-andam,

Sa mga amiga kong Ginatilanon…