Hiraminta

Napugwat dihang mikariring ang hiramintang punay'ng gialsa-alsa

Mihuyatid dayun ug mituy-od ako aron kini makita ug si kinsa

Apan sa pagbulikat ko sa duha ko ka nagpiyong-piyong nga mga mata

Pangalan mong nalatid ug nahisulat sa dagkong letra...

Tungod sa kahingawa kanimo gusto tikang tubagon ug maistorya

Tiil ko gapanikad, kasingkasing gusto nga pamarayegan ka

Apan luyo sa nag-uros-uros nga pagbati, ako hikulbaan ug nabalaka

Kay basin sa imong pagbalik, sa kasaypanan pag-usab malingla...

Mibati ako'g usa ka sinyalis nga ikaw mobalik na gayud

Susama sa kampanang karaan nga mibagting pagkusog

Bisan sa halayo tataw kining mabati ug imong madungog

Mapakgang ka sa imong gipambuhat, mapakamalandong sa kalanog...

Makaako pa kaha sa paglikay nga huyang man ko kabahin nimo?

Karon nga mipaduol ka, gasikitsikit man pag-ayo sa akong luyo nagbutho-butho

Mibalik ka ug gisaadsaaran mo na usab ako nga kanunay kang tagana alang kanako

Ug sa imong gugmang mugna-mugna, ako unta mituo apan di ka man diay sigurado...

Isalibay ko nalang kining akong butang nga hugot kong gigunitan

Kay basin mao na usab kini mohatag kanako'g pag-antos nga hilabihan

Pipila man unta nga kinabuhi ang nalugwayan pinaagi sa iyang tabang

Apan sa mga kablit sa mga tintal, dali ra usab mopaundayunan...