Nagkatawa lang ka,
samtang ako naghangos
nga naghangad kanimo
galukdo sa adlaw.
Gatuo siguro ka nga
ang mga turok sa singot
sa akong agtang-
sa ilang pagdailos
maoy makapapiyong kanako.
Oo, halapad ang imong
bunsaran, para nimo --
dako-taas pa nga sud-ungon;
kahibawo pud ko
dili sayon ang pagkatkat unya
sa imong
lawas. batuon, tunukon ang palibot
ug tungason.
Hinumdumi…
ako pang gilukdo ang adlaw
wala pay buslot akong tsinelas
ug napa ko'y gibalon
nga mga tikang.
Timan-i…
dili naka kairog. Magpabilin ra ka
sa imong gibarugan
ug sa kanunay magtan-aw
sa kutob sa
imong makita.
Bisan tuod unsa kanindot, nga naa
ra ka diha permi sa ibabaw,
sultian tika:
ako ra gihapon nang mabuntog ang
kaanyag nga imo perming masaksi.
Ug maglaway lang 'nya ka, samtang
ako nang iasoy kung unsa kaanyag ang
dagat sa mga bulak, ang dasok
sa mga alibang-bang ug ang
kalingaw sa panaw-
nga kausa, hulmigas lang
sa imong
panglantaw.
Jessrel E. Gilbuena
Santa Fe, Bantayan, Cebu