Linog

Sa imong pag-abot mga tawo nagkagubot

Daw palibot kong gipuy-an gatuyoktuyok

Ulo ko naglabad sa pagtugkad nagsipok

Sa kahibulong sa hitabong dili ko gayud masabot.

Mitay-og akong nahimutangan ug gitumban

Mipatuyatuya sa lingkuran ginama sa tuod ug kawayan

Mipakiriring sa mga tingga nga sa arkansiya gitaguan

Sa bungbong mipabanda nga dili gayud mapugngan.

Mipaghot pag-ayo iro sa among silingan

Mga manok hiniktan sa tangkal nanglayog daw nakulbaan

Ang ila bang mga lihok miduyog sa tumang kalisang?

Kay tawo nagpakabuhi man sa sayop nga binuhatan.

Kung ingon ani ang hitsura sa oras sa pagpanugilon

Usa ka tilimad-on nga kanato mipasidaan-gapahinumdum

Asa naman lang kong dapita diay motago ug mopasilong

Aron mapanalipdan ko pinangga kong mga anak ug pag-umangkon.?

Dili gayud diay matag-an ang susama niining katalagman

Nagsingabot nga adlaw sa katapusan wala pa man nakapangandam

Mao sa kanunay mag-ampo ug maghinulsol kitang tanan

Ihangad sa langit kaluwasan sa atong kalag sa laing kalibutan.