Kagutom

Dugay akong napukaw sa pagkahinanok bisan pa man sa kaalimuot sa gikatulgan

Tungod kay akong panginabuhian sa kagabhiun man gilatid sa kapalaran

Mao nga hasta ang pagsubad ug pag-inom ako nalang malak-angan

Ug karon gibati ko ang kakutoy nga walay sama sa nagbagulbol kong tiyan...

Mikanaug akong nanimpad niining bugnaw nga kaadlawon’g masolub-on

Bisan pa man sa kakusog sa uwan tagaktak sa atop daw gahungihong

Apan wala ko nanumbaling ug nangita kog tindahan sa pagkaon

Aron kining danguyngoy nga tipik sa inadlaw’ng pangginahanglan akong tagbawon...

Nakapahiyom ako niiini karong akong nahiaguman

Kay sa akong pagkagahi ug ulo mao’y akong nasangputan

Ang paglakawlakaw sa ngiub nga dalan wa ko damhang maagian

Apang sulngon ko nalang gayud aron makalamoy ug kini masudlan...

Dili gayud diay lalim ang panahon nga tinai mangalukot

Mapasalamaton ako nga sa bulsa ko duna pay makuot

Kamakalolooy adtong mga tawong gipanganak nga walay nahot

Kutob nalang sila sa pagpaatbang sa mga lamian aron mosimhot...

Niining akong nasinati karon duna ako’y nakat-unan

Nga ang kinabuhi sa tawo arang ka kulba-hinam

Di mo gayud matag-an kung kanus-a ka tawgon o kaha hunghungan

Mao nga kada liyok sa orasan angayan gayud nga pangandaman...