Ikaw na ba gayud?

Ang bihuhat alang kanako nga gimugna sa tawo

Nga sa panganod gipakanaug aron akong makatagbo

Sa suok niining nagsalimu-ang sa kaguol maoy mipabuhi kanako...

Kung ikaw na gayud

Ang maghatag kanako sa kalipay’ng hingpit

Sa punay kong paghunahuna tataw kaayong daw ako gigitik

Nakapapagaw niining akong pagbati nga sa hilom gasyagit...

Kung ikaw naman kaha gayud

Nga sa dugay kong panahon gipaabot

Sa nataran niiining salabotan dugay kong ginaaghop

Ilabi na sa higayong nagmasulub-on, gukdon ang buhawi aron lang masimhot...

Kung ugaling ikaw naman kaha gayud

Ayaw na paglangan ug dungga na kining uyamot

Nga sa trinangkahan mong mga pultahan kusog nga nanuktok

Aron matilawan lamang walay aslom mong pagtugot...

Kung ugaling ikaw naman kaha gani gayud

Papuwaha na intawon kining kasingkasing dugay nang naghinuktok

Nga sa tumang kauga mabisbisan na sa maiiniton mong gakos ug halok

Nga wala na gapamintik, mas kusog pa mulabtik kuyamoy sa orasan inig tuyok..

Kung matuman na nga ikaw na gayud

Kini mao’y akong ipanumpa nga unungan tika bisan pa sa malabhagong latigo

Hangtod matagbaw sila sa pagpasipala ug makaamgo nga walay makapukan nato

Gawas lamang kung kining akong gituhuan karon usa ra diay ka damgo...