Ang Ginabot sa karaang terminal

Sa mga pungko-pungko nga akong nasulayan,

Adunay lugar nga akong gibalik-balikan,

Tungod sa paagi nila pagluto,

Sa matang sa sud-an nga pinangita dinhi sa ato.

Usa sa ilang mga linuto nga hilabihan nakong gikahinaman,

Lamian ug talagsaon nga sud-an,

Dili hingpit ang pagkaon kun kulang,

Ginabot ang dagnay niani sa kadaghanan.

Unsa man gyud ang matang sa sahug nga gibutang,

Nga daw sama nga malumay ka sa panlitok nga giyamyam

Magpangita ug maghinam-hinam,

Sa pag-ingkib niining ginabot, katagbawan matagamtam.

Ang kalami ug kahalang sa sawsawan nga manuot-suot sa dila,

Sa kagumkom akong mabatyag ang kalami ug himaya,

Daw sama sa gigitik-gitik sa dimdim ang kaugalingon,

Makapahupay sa kalunos ug kagutom.

Kay sa gikaingon pa sa panultihon,

Once tasted always wanted sa pulong Inglis,

Maningkamot gyud nga makalamoy sa maong putahi nga dili malalis,

Nga lamian ug dili ikatandi sa ubang pagkaon.

Dili nako matandi ang makapatagbaw nga kalami,

Sa akong kinaham nga pagkaon,

Didto lamang nako kini makaplagi,

Sa karaang terminal sa Opon.