Sa Lawak nga Ngitngit alang ni Jelly

Day, tan-awa sa ko.

Ayaw ko’g talikdi

Kay nag-atubang ko nimo

Naa koy hangyo nimo.

Pwede ba ko nimong dal-on sa imong lawak?

Naa man gud koy nadunggan nga

itom daw ang kolor niini.

Aduna pa gyud kuno kay TV didto nga invisible.

Puro nindot kuno ang salida, fairytale

Nga matod pa, imong dunggan ray makakita

Kuyawa ana gud!

Asa man na dapit inyong balay ba?

Paadtua ko bi,

Kay gusto pud nako nga mapriso anang kangitngit.

Hayag man kaayo diri sa gawas gud,

Daghan kaayo ko’g bati nga masaksi.

Ang kahayag kay sakit kaayo sa mata,

Unya ang mga panghitabo, hilom ra

Dili halos makita sa dunggan

Ah, pero grabiha lagi, banha kaayo

Dungog gud sa akong mga mata

Adto na ta, day,

Gusto na pud ko makasuwat og balak

Nga hinubad gikan sa imong kangitngit

Ug tan-awon nato unya

Kung asa ang mas nindot,

Ang ako bang lawak nga hayag

O kanang imoha nga ngiob.