Ang pagbikang ubanag hayon.
May destinasyon o wala.
Matag pitik sa taknaan
dunay kalamposan ug may
kapakyasan sab. Hain man
niinging duha, padayon
ang paglakang. Walay hunong
ang paglantaw sa unahan.
Adunay tul-id nga dalan
ug may nagkurus sab.
May kahayag makahapsay
sa matag lakaw. Adunay
kangitngit ug dili makita
ang padulngan. Makapandol
ug makapasukamod. May nagdali
nga mga lakang. Aduna usay
pinahimutang. Hain ang
mahinungdanon? Ang kasingkasing
may pagbati. Ang utok moanalisar.
Kon mag-uban kining duha,
makab-ot ang gitinguha
nga damgo. Kay ang lakang
ug hayon usa ra!