Gihigugma ko ikaw sa tibook kong kinabuhi ug kasing-kasing sa walay pagduha-duha
Apan ang gibalos mo kanako dili masukod nga kasakit nga wala ko damha
Boot ko ikaw nga panimaslan ug ipabati ang tanan nga akong natagamtaman
Kay kining akong dughan igo man lang nimo nga gipasakitan ug gipasipad-an
Nakita ko kamo nga duha nga pagkamalipayon
Tam-is mo nga pahiyom lupig pay nikaon ug mangga nga aslom
Ug ako nga nagtan-aw,nagpahipi sa mga panganod nga nag itom
Aron sa matag lingi mo kanako, hanap ug dili ang akong pamayhon
Gusto kong magbasa sa ulan, aron mga luha ko dili mailhan
Ug ang mga nanghubag kong tabon-tabon mohiyos ug sa bugnaw matambalan
Kay sukad sa na andan karon ko lang natagamtaman ang gugmang walay hinungdan
Nga kanimo ko lang gihalad ug gipabati ang sulod ning akong dughan
Ako mapasalamaton sa atong labaw nga makagagahom
Ako wala Niya pasagdi ug giagak sa kalibutan nga dangug
Busa ako kanunay na magmatngun sa bul-og sa tintasyon
Kay si bisan kinsa wala masayod kon anus-a kita Niya kuhaon
Sa matag karon ug unya ikaw ang akong mahuna-huna
kay ang gibuhat mo kanako dili mapapas o mawala
Apan sa ingon ako kanimo mapasalamaton sa tanang higayon
kay ikaw ang gihatag nga instrumento nga kanako mipabarog ug milig-on.