Happy Father's Day! Sa Balay Hukmanan (usa ka bahin sa transkrip)

Ate, nganong nakasu’d man ta sa gate?

Wa na man si Nanay.

Gipasu’d ta bisan wa si Sir?

Unsa? Gisugot nimo si Carpio?

Kabastos anang guwardiyaha.

Tapulan pa gyud. Na’y, tu’g-tu’g lang.

Gipakatu’g? Nimo?

Pag-sure diha, Te ha.

Tingay’g di na na kamata.

Pagkadako na lang gyud diay ning balaya.

Ang hagdan, arang lapara.

Makaagi gud diri atong kabaw

Bisan magharang pa.

Apan dili diay.

Dili gyud diay siya makaagi.

Paagi-on diay diri ang nagkalapok?

Banghagan man gani’g bugawon

Si Nanay nga nagkadusingot,

Ang nagkalapok na ba.

Ngano ka, Ate? Pahiyum pud diha uy. Mura ka’g kakan-onon og tawo.

Dako-a diay sa ilang sala.

Ang mga sopa ug siya, arang humoka.

Nindota kahang ikatulog diri sa?

Apan di lang ta uy.

Insultuhon man gani si Nanay

Nga nakapiyong lang sa kakapoy,

Ang naghagok na ba.

Uy, Te, nganong nagkagot ka? Di ra ba ka motingog.

Dako-a pud gud aning kan-anan nila.

Kung magkumbira sila, arang na lang bonggaha.

Ari na lang kaha nato kan-on atong bawon.

Apan, ayaw lang diay uy.

Gitamay man gani si Nanay

Nga nakagaras lang og plato,

Kita na bang estrangherong

Makabilin unya’g mumho.

Hala, Te, ngano man ka? Tagda pud ko bi.

Dako-a na lang gyud sa ilang kusina.

Ilang gas range ug microwave,

Arang gyung daghana.

Ari kaha nato lutu-a ang uban tang kinompra

Apan naunsa, di ta uy.

Lahi man gani ilang ipakaon ni Nanay

Nga ila ganing kusinera,

Kita na ba kaha’y mogamit sa patis nila’g mantika?

Nangumo lagi ka, Te. Na-irita na ka nako?

Dagko gyud ang mga kuwarto diri sa ila.

Uy, mura lagi’g abli ang usa. Motan-aw ta?

Di kuyaw’g si Sir, mokalit og tunga?

Ha? Si Nanay? ‘Tong usang buwan?

Maong wa na nato igkita?

Hala, asa man ka, Te?

Kuhaon ko ang pusil atong bastos nga guwardiya.

Di na man to makamata.

Ug si Sir? Adlaw na ron sa panudya.

Tagaan ta’g kalinaw si Nanay.

Lingkod lang diha. Hapit na moabot si Sir.

Hukman ko na’g bitay ‘tong mangtasa!