Mamugnaong taming: Mga kerubin sa balay'ng marmol

Gipukaw ni Petra ang iyang kapikas nga si Juanito. “Paminawaaa…paminawaaa ra, Nito! Naay nagdanguyngoy nga bata,” sagol kahadlok nga sugilon ni Petra.

 “Iring lang na, nag-uwag shhhiguro,” hungaw nga tubag sa pangag nga Juanito. “Ashha man kuno beh? Ashha na nagikan ang danguyngoy?,” timbakuwas sa daw naalimungawan nga Juanito. Pagkataodtaod midali kini pagtaod sa iyang pustiso sa dihang gikamay siya ni Petra nga panunton.

Gisubay ni Petra ang gigikanan sa maong danguyngoy. “Iring god tawon tatot! Tiguwang na ta para di ko kaila’g tingog sa iring uy!” Bagutbot ni Petra.

Nagnunot si Juanito. “Mingaw pa man sa tirana. Imo ra mang tsinelas ‘tra ang nagpalakpalak,” buyag niya.

 “Shhh…naa sa garahe-an. Sus, Nito! Kining atong amo gibutang gyod ta’s peligro. Giingnan na kana siyang daan nga may misteryo dinhi’s balay’ng marmol unya iya pa gyod nga gipalit kay buhatong museum alang sa iyang koleksyon sa mga insekto,” yawyaw ni Petra.

Lepidopterist ang amo nilang Petra ug Juanito. Buot siyang may hamugaway nga kabutangan sa iyang koleksyon sa mga gipaugang sapat. Buot siya’g dakong wanang nga kasab-itan sa uban pa niyang pinintal ug mga obra maestra nga migamit sa mga pako sa patay’ng lawas sa kabakaba isip medyum. Sa balor nga uno punto singko milyones, lakip na’ng yutang gitarokan, napanag-iya na ni Professor Goddard Marzon ang balay’ng marmol nga gitoohang “haunted house”.

Inay tuyokon ni Juanito ang “knob” sa pultahan padulong sa garahe-an, nahauknol siya. “Basin bayag kawatan ‘tra. Diskuhido ta! Maluba ta’g di oras ini. Ug di gyod ta makapanawag og panabang ni propesor kay dungan man tang bakli-aron, baatan atong baba,” hagawhaw niya.

Mibutokbutok ang dughan ni Petra. “Sus kakuyaw! Sige ugma na lang. Kanang hayag na, suta-on nato.”

Mibalik na sa kwarto ang magtiayon. Apan si Petra wala gilayon duawa sa katulogon. Samtang nagsige siya’g balikbalik og rosaryo, namatikdan niya’s Juanito nga nagyamyam human sa dali niining pagtidlom ngadtos kahinanok. “Mmm…ga…ra…he…kawooot ga..ra…he,” daw sa giurom kini. Gipukaw na usab niya ang iyang bana.

 “Nito…Nito…, mata uy. Mata!” Uyog sagol dagpi niya’s abaga ni Juanito.

Napugwat na sab si Juanito. “Sush ‘tra, kangil-ad sha akong damgo!”

Mitimbakuwas siya, gitaod pagbalik ang pustiso, ug misugid kang Petra sa iyang makahahadlok nga damgo. “Kadaaaghaaang gunting nga nagkaadugooo ‘tra. Matag gunting mahagbong sa usa lamang ka bahin sa garahe-an. Ug inig kaigo sa tumoy sa gunting sa sementong sawog, motuasik ang unod sa tawo,” nakapanguros si Juanito. “Hesus, Hesus! Kangilngig, kangilo, kaluod baya.”

 “Nito, dili kaha to tilimad-on? Ako maoy gipadungog og danguyngoy ug ikaw gipakita pinaagi sa damgo nga naa gyo’y misteryong naglimin ning balaya?” nagkurog ang tingog ni Petra.

 “Ugma dayon ‘tra,” nagkanayon si Juanito, “sa mosugot ug dili si propesor susihon ta kun unsay nalubong dinhas garahe-an.”

Tuod man wala mag-usik og panahon ang duruha kay sa pagbanagbanag pa lang, nanawag na si Juanito og masuholan aron kaabagan siyang kasugdan pagbungkag ang kongkretong garahe-an sa dapit diin nakita ni Juanito ang maong tilimad-on. Samtang si Petra sayong nagdegamo og ikapamainit aron isilbi sa iyang bana ug duha ka sinuholan.

Ug sa dihang nabungkag na nila ang sawog ug nakakuykoy na sila’g may igong gilawmon nga gisementong bahin niini, nahangangha sila sa ilang napalgan ilawom sa kinawtan – usa ka “crate” sa mga garapon nga may mga fetus nga gipanghumol sa formalin.

Duha sab ka adlaw ang imbestigasyong gipahigayon sa mga kapolisan. Nasayran nilang Petra, Juanito ug Professor Goddard nga ang kanhi nagpuyo niini nga doktora may lain sab diay nga opisyo gawas sa pagpanghiling sa mga babayeng mabdos o kadtong kintahay buot manamkon.

Pipila ka buwan sa wala pa siya molalin ngadtos London, sa garahe-an niya gipanglubong ang mga kerubin nga nakatagamtam sa kapintas sa iyang matang sa panapi.