Labihang lipaya gyod nako sa dihang gidawat na ni Suzeth ang gipadayag kong gugma kaniya. Daan nakong nakamatikod nga may pagtan-aw sab siya kanako, mao nga wa ko gyod lung-i sa pagdiga hangtod nga misugot gayod. First love ko siya ug first love sab ko niya.
Gihilom lang namo ang among relasyon kay dili kami buot nga mahibaw-an sa among mga silingan kay estrikto kaayo ang iyang Papa Jose ug estrikta sab kaayo si Mama niya Lita. Gani ang iyang duha ka manghod nga si Lito ug Leleth nga desesayis ug katorse anyos na, wala gayod masayod sa among panaghigugmaay bisan pa sa ilang panagkuyog paingon sa tulunghaan ug bisan sa ilang pagpanuroy sa mga mall sa siyudad.
Adto ra kami magkita ni Suzeth sa library sa among eskuwelahan ug kanang manimba mi nga dili mokuyog ang iyang mga manghod. Sa panahon nga mosuroy siya kuyog sa iyang mga suod higala nga mga klasmeyt niya, magpaantaw lang ko nga magsunodsunod kaniya. Makapahiyom lang siya nga makamatikod kanako nga magpaantaw lang.
Dunay mga higayon nga makapanan-aw gayod kami og sine. Pormal kaayo akong makigtupad kaniya. Magpanagana gyod kong moagbay o mohikap sa iyang kamot sa pagtuo nga lainon unya niya pagsabot. Ako gayod nga gipabatyag kaniya kun giunsa gayod ko siya pagmahal. Dili ko buot nga masuko siya mao nga wala gayod ko mangahas sa paghikap kaniya. Malipay na lang kaayo ko nga magsultianay mi. Dunay higayon nga kanang magkadikit kami, maayo na gyod kaayong igakos niyag piit ug unya hagkan kutob sa akong mahimo, labi na kay maibog kaayo akong magtan-aw sa ubang paresan nga maggakos ug maghagkanay. Dugay gyod kaayong magkaukang. Si Suzeth nga akong sultihan sa gibuhat sa uban, igo lang mokatawa ug moingon: "Unya, unsa may hunahuna mo?"
Tungod sa akong kaibog sa gibuhat sa uban, giagbayan kog kalit si Suzeth ug gikabig aron madip-ig kanako.
"Naunsa ka, Mel? matod niya, "Nagkiat ka man lang diha?"
Tsup!
Gihagkan kog kalit ang iyang tuong aping.
Mikatawa siya ug gitulod ang akong nawong. "Naunsa baya 'na siya..."
"Sagdi lang god, uyab na bitaw ta..."
"Unyag uyab," gidagpi niya ang bukton ko, "mangalit diay ka?"
"Natural!" paundayon ko. "Love ta god ka kaayo..."
"Hmmmm..." nakita kong mitamihid sya kay naatol nga mihayag ang salida sa telon, "bulada diha, Melito..."
Wala na lang ko maglihok apan nag-agbay gihapon ko kaniya. Taudtaod gayod nga nagpabilin kami sa maong kahimtang. Hangtod, miagda siya nga manggawas na mi.
Miabot gayod og usa ka tuig kapin ang among panagtrato nga matag tan-aw namog sine, igo lang ko sa pag-agbay-agbay kaniya kay gibati na man hinuon akog kataha. Usahay gunitan ko ang iyang usa ka kamot ug hapuhapon. Nalipay na lang usab ako sa maong paagi sa pagbati ni Suzeth sa akong dakong paghigugma kaniya.