Bathalad Isip 3
Ang kremahon, nagbawod nga bunbon
sa nag-ugdong desiyerto sa Al-ajam
Nagkuray sa katugnaw nga gibughan sa daw
sinambogag yelo nga huyuhoy sa Disyembre,
Ug sa unahan, sa layong sidlakan,
ang bulawanong Adlaw mao pay pagmata;
Hapo kaayong pagsud-ong
sa gabonong dughan sa Saudi Arabia.
Dinhi, ang kamingaw ug ang katugnaw
makapahinumdom nato pagbalik,
Niadtong balaanon nga kasugiran
sa pagkahimugso sa Bata nga Balaan,
Kanus-a ang matuod nga Pagtuo
midan-ag sa galamhan sa tawo –
Apan dinhi sa tinubdan sa “itom-nga-bulawan”
ang mga Arabyano way pagtuo sa Pasko!
Apan kining diwa nga nagbalaan sa wagas
nga kahulogan sa Gugma sa Mesiyas,
Sa hilom, magbinugtong na lang pag-awit sa:
“Kasadya ning Taknaa!” agig paghandom
Nga karon, Pasko na usab diay…
ikaduhang Pasko sa akong pagpahilayo,
Maoy Pasko sa mga paghandom,
Pasko sa akong mga kamingaw;
Niining masulub-on nga pagpanimpalad
sa libod-suroy kong kinabuhi!