Ang kinabuhi sa tawong kabus,
Mahiagmon kanunay sa mga pag-antus;
Apan kon ikaw tawong kugihan
Ang paglaom kanunay paglantawan.
Kay bisan pa ang mga adunahan,
Kon magpasagad lang ug magsalig
Ug sa daotang bisyo sila magpatuyang,
Ang ilang kadato mawagtang - makuyaig!
Busa ayaw hilaki tanan mong kapakyasan,
Paningkamot gayod nga ikaw makabangon;
Tindog, himoa laing hunat sa kadaogan
Hangtod kalamposan imong maangkon!
Sanglit himoang tahas ang pagpakigbisog,
Asdanga kanunay ang hagit sa kapalaran;
Itahan ang imong kakugi ug kaisog,
Pagkab-ot sa gidamgo mong tingusabawan!
Kay sa ingon lamang niini nga paagi,
Kitang tawo sa kalisod ay mahaw-as;
Wa nay luha sa kapait nga modahili
Kon dili: luha sa kadaogan ang moagas!